कोरोनाबाट अछुतो रहेन गोरखा, एकै दिन १० जना संक्रमित

२५ जेठ, गोरखा । गोरखामा पहिलो पटक कोरोना भाइरस संक्रमण देखिएको छ । आइतबार एकै दिन गण्डकी गाउँपालिकाका ९ र पालुङटार नगरपालिकाका एक जनामा संक्रमण पुष्टि भएको हो ।

गण्डकी गाउँपालिकाका संक्रमितहरु २० देखि ४३ वर्ष उमेर समूहका छन् भने पालुङटार नगरपालिकाका संक्रमित १७ वर्षीय युवक हुन् ।

उनीहरुमध्ये ९ जना क्वारेन्टाइनमै थिए भने एक जना प्रहरी हिरासतमा थिए । उनीहरुको यही जेठ २० गते पीसीआर परीक्षणका लागि नमूना संकलन गरेर प्रदेश जनस्वास्थ्य प्रयोगशाला पोखरा पठाइएको थियो ।

गण्डकी गाउँपालिकाको रत्नेश्वर मावि दर्वुङ र भिमोदय आधारभूत विद्यालयको क्वारेन्टाइनमा रहेका ४र४ जना र ज्ञानमार्ग माविको क्वारेन्टाइनमा रहेका एक जनामा कारोना देखिएको बताइएको छ ।

उनीहरुमध्ये आठजना भारतबाट आएका हुन् । संक्रमितहरुलाई जिल्ला अस्पताल गोरखाको आइसोलेसन वार्डमा ल्याउने तयारी भइरहेको छ ।