आज लकडाउनको ७६ औं दिन, उपत्यकामा गाडीको चाप बढ्यो

२५ जेठ, काठमाडौं । सरकारले कोरोना रोकथाम तथा नियन्त्रणका लागि लागु गरेको लकडाउनको आज ७६ औं दिन पुगेको छ । लकडाउन जारी रहेपनि पछिल्लो समय उपत्यकाका मुख्य सडकहरुमा सवारी साधनको चाप दिनप्रति दिन बढ्दै गइरहेको छ ।

हिजो दिनभर जसाे माैसम बदली भएर पानी परेकाले उपत्यकाभित्र गाडीको चाप केही कम थियाे । तर आज बिहानैबाट काठमाडाैं उपत्यकामा गाडीको चाप बढेको ट्राफिक प्रहरी महाशाखाले जनाएको छ । ट्राफिक प्रहरीले बानेश्वर, माइतीघर, थापाथली लगायतका विभिन्न ठाउँमा सवारी जाँचलाई कडा पारेको छ । आज उपत्यकाका मुख्य सडकहरुमा सरकारले गरेको लडकडाउनको निर्णय फेरबदल नभएको तर अरु दिनको तुलनामा चहलपहल केहि बढेको सहजै देख्न सकिन्छ ।

तेसाे त गाडी चलाउन पास प्राप्त भएकाहरु थपिदै गएको, उद्योग तथा कलकारखाना खुल्न थालेको, बैंकहरु पनि खुलेका, अत्यावश्यक सरकारी कार्यालयमा सेवा नरोकिएको, बाहिरी जिल्लाबाट समेत काठमाडाैं भित्रने क्रम बढेको र विकास निर्माण तथा कृषि सामग्रीका गाडीलाई नरोकिएको हुँदा चहलपहल बढेको हाे ।

लकडाउनले जनजीवन र आर्थिक क्रियाकलापमा समेत असर पर्न थालेका कारण मानिसहरु लकडाउनको पर्वाह नगरी काममा निस्कन थालेका हुन् । सडकमा साना र निजी गाडीहरु अरु दिनको तुलनामा आज धेरै चलेका छन् । तर लकडाउन नखुलेकाले अत्यावश्यक कामबाहेक र बिना पास चलेका ११ सय ५ वटा गाडीलाई होल्ड गरिएको छ ।  ट्राफिक प्रहरी बुलेटिनका अनुसार बिहान ५ बजेदेखि ११ बजेसम्मको अवधिमा ती गाडी होल्ड भएका हुन् । थापाथली लगायतका ठाउँमा गाडी चलाउने क्रम बढेपछि जाँच गर्नुपर्दा केहीबेर ट्राफिक जाम समेत हुने गरेको छ ।

काेराेना भाइरस रोकथाम तथा नियन्त्रणका लागि सरकारले गत चैत ११ गते यता लकडाउन गर्दै आएको छ । सरकारले लकडाउनलाई जेठ मसान्तसम्म लम्ब्याएको छ ।