नेकपाभित्र चर्किने भो रडाको

२५ जेठ, काठमाडौं । केही दिनयता सतहमा नदेखिएको सत्ताधारी नेकपाभित्रको कलह भोलिबाट फेरि शुरु हुने भएको छ । अमेरिकी सहयोग अन्तर्गत सञ्चालनमा आउन लागेको मिलेनियम च्यालेञ्ज कर्पाेरेशन पारित गर्न तीव्र दवाव परेपछि नेकपाले भोलि सचिवालय बैठक बोलाएको छ ।

यसअघि बसेको सचिवालय बैठकमा परिमार्जनसहित एमसीसी पारित गनुपर्ने मत बलियो भएको थियो । सो बैठकमा पार्टी अध्यक्षसमेत रहेका प्रधानमन्त्री  केपी ओलीले यसबारे संसदले नै उपयुक्त निर्णय लिने बताएपछि विवाद केही साम्य भएको थियो । साथै, यसबारे टुंगो नलागेसम्म एमसीसी अन्तर्गतका काम रोक्ने सहमतिसमेत जनाइएको थियो ।

तर भोलि भने ओलीले सचिवालय बैठकमा एमसीसी पारित गरिछाड्ने आफ्नो धारणा सुनाउने स्रोतको दावी छ । ओलीको चाहना अनुसार अरु सचिवालय सदस्यले सहमति नजनाउने अवस्था भएकाले यो विवादले फेरि नयाँ रुप लिने धेरैको बुझाई छ । एमसीसी प्रकरणमा ओली पक्ष कमजोर छ । तर बिगत तीन वर्षदेखि कार्यान्वयनमा आइसकेको एमसीसीबाट भाग्ने अवस्था नभएको ओली पक्षको तर्क रहेको छ । ओली पक्षले यस्तो तर्क प्रस्तुत गरेपनि सहजै पारित गर्न भने गाह्रो देखिएको छ ।

केन्द्रीय कमिटीले यसबारे अध्ययन गर्न वरिष्ठ नेता झलनाथ खनाल नेतृत्वमा कार्यदल बनाएको थियो । भीम रावल र प्रदीप ज्ञवाली सदस्य रहेको उक्त कार्यदलले परिमार्जनसहित एमसीसी पारित गनुपर्ने राय दिएको थियो । तर सदस्य ज्ञवालीले भने त्यसमा १५ बुँदे असहमति जनाएका थिए । यही मुद्धाले एकपटक फेरि नेकपाभित्रको भुसको आगो सहतमा आउने भएको छ– राजनीतिक विश्लेषक डा. सुरेन्द्र केसी भन्छन् । नेपालको स्वाधिनता र आत्मसम्मानमा चोट पुग्ने खालका बुँदा रहेको स्पष्ट गर्दै उनले एमसीसी यथास्थितिमा स्वीकार्नु भनेको भोलि अरुका लागि पनि बाटो खोल्नु हो भने ।

यस्तै प्रकृतिको कुनै परियोजना भारत वा चीनले सञ्चालन गर्ने रुचि देखायो भने के गर्ने ? उनी प्रश्न गर्छन् । एमसीसी कार्यान्वयनमा कुनै विवाद सिर्जना भए नेपालको कानून आकर्षित नहुने प्रावधान नै मूल समस्यको जड हो – डा. केसी भन्छन् । यही मुद्धामा नेकपाभित्र समस्या सिर्जना हुने र सत्ताको बाँडफाँडमा पुगेर मात्रै समाधान गर्नुपर्ने अनुमान उनले गरेका छन् ।