कोरोनाबाट निधन भएका गुरुङको शव व्यवस्थापन गर्न हम्मेहम्मे

२६ जेठ, काठमाडौं । कोरोना भाइरस संक्रमणले निधन भएका स्याङ्जा वालिङ्का ५८ वर्षीय पुरुषको शव व्यवस्थापनमा स्थानीयले अवरोध गरेपछि प्रशासनलाई हम्मेहम्मे परेको छ

शव लिएर गएको गाडीको बाटो छेक्न स्थानीयबासीसँगै स्थानीय जनप्रतिनिधि, प्रदेश सांसदसमेत आएपछि प्रहरीले लाठी चार्ज गर्नुपरेको छ । संक्रमण फैलिने डरले त्यसो गरिएको बताइएको छ ।

गएराति साढे ११ बजे वालिङ नगरपालिका ३ का हर्कबहादुर गुरुङको पश्चिमाञ्चल क्षेत्रीय अस्पतलमा निधन भएको थियो । गुरुङ समुदायको परम्परा अनुसार पोखरा महानगरले उनको शव हरियोखर्कमा व्यवस्थापन गर्ने निर्णय गरेको थियो । तर उनको शव स्थानीयले व्यवस्थापन गर्न दिएनन् ।

अवरोधपछि उनको शव वडा नं ११ स्थित सेती नदी किनारको रिट्ठेघाटमा व्यवस्थापन गर्न लागिएको छ । तर त्यहाँपनि स्थानीयले अवरोध गरेका छन । जेठ २२ गते सुनौली नाकाबाट उद्दार गरिएका वालिङ नगरपालिकाका उनलाई २३ गते पश्चिमाञ्चल क्षेत्रीय अस्पताल, पोखरामा भर्ना गरिएको थियो ।