ठूलो परिमाणमा लागुऔषधसहित एक जना पक्राउ

◊ धीरुभाइ

२७ जेठ, सप्तरी । चालमकाे बोरामा लुकाइछिपाइ ल्याउदै गरेको अवस्थामा ठूलो परिमाणमा लागुऔषधसहित एक युवकलाई सोमबार प्रहरीले पक्राउ गरेको छ ।  सप्तरी प्रहरीले जिल्लाको बिष्णुपुर गाउँपालिका १ खुरहुरियाबाट हनुमाननगर कंकालिनी नगरपालिका १ भारदह बस्ने वर्ष २२ को अनिल कुमार मण्डललाई पक्राउ गरिएको हो ।

जिल्लामा शान्ति सुरक्षा कायम गरी अपराध रोकथाम तथा नियन्त्रण गर्ने उद्देश्यले जिल्ला प्रहरी कार्यालय सप्तरीबाट खटिएको प्रहरी निरीक्षक सन्तोष कुमार खड्काको कमाण्डको प्रहरी टोलीले चेकजाँच गर्ने क्रममा लागुऔषध फेला परेपछि मण्डललाई पक्राउ गरिएको बताइएको छ ।

पक्राउ परेका मण्डलले अर्कैको नामको ल्याब असिस्टेन्टको परिचय पत्र साथमा राखेर बा. ६७ प ४८५३ नम्बरको मोटरसाइकलमा लोड गरी दक्षिणबाट उत्तरतर्फ ल्याउदै गरेको बोरामा शंका लागेर चेकजाँच गर्दा खाद्यन्न चामलको बोराभित्र लुकाएर ल्याउदै गरेको प्रतिबन्धित लागुऔषध बरामद गरेको सप्तरी प्रहरी प्रवक्ता प्रहरी नायब उपरीक्षक तिलक भारतीले जानकारी दिए ।

चामलको बोराभित्र लुकाइएको अवस्थामा स्पास्मोप्रोक्सीभान प्लस १३२ पत्तामा २४ क्याप्सुलको दरले तीन हजार एक सय अरसठ्ठी क्याप्सुल, डाइलेक्सडीसी २८ बोतल बरामद भएको उनले जानकारी दिए । पक्राउ परेका मण्डललाई मोटरसाइकल र बरामद लागुऔषधसहित सप्तरी जिल्ला अदालतबाट २५ दिनको म्याद थप गरी थप अनुसन्धान कार्य भइरहेको बताइएको छ ।