बयरघारीबाट स्वरेकका लागि छुटेका जीप दुर्घटना, एकको मृत्यु, ७ जना घाइते

३१ जेठ, स्याङ्जा । स्याङ्जाको भीरकोटमा जीप दुर्घटना हुँदा १ जनाको ज्यान गएको छ भने ६ जना घाईते भएका छन् । बयरघारी बजारबाट स्वरेकका लागि छुटेको ग २ च २३७३ नम्वरको महिन्द्रा जीप भीरकोट नगरपालिका ५ को नेटामा दुर्घटनाग्रस्त भएको हो ।

दुर्घटनामा परी स्थानीय १६ वर्षीया दुर्गा अर्यालको निधन भएको छ । त्यस्तै दुर्घटनामा परी जिप चालकसहित सात जना घाइते भएका छन् । घाइते भएका अन्य ७ जनालाई थप उपचारका लागि पोखरा पठाइएको स्याङ्जाका प्रहरी उपरीक्षक विमलराज कँडेलले जानकारी दिए । अर्यालको उपचारका क्रममा कालिका सामुदायिक अस्पताल हेलुमा निधन भएको प्रहरीले जनाएको छ ।

दुर्घटनामा भिरकोट– ५ की ३७ वर्षीया शान्ती अर्याल, ३६ वर्षीय गीता अर्याल, २७ वर्षीया पार्वती अर्याल, ५६ की शोभा अर्याल, ७० वर्षीय भीमकुमारी अर्याल र २४ की सुस्मा अर्याल घाइते भएका छन् । उनीहरुलाई उपचारका लागि गण्डकी मेडिकल कलेज पोखरा लगिएको प्रहरीले जनाएको छ । राम्दीमा पुगेर पूजाको फूलपाती सेलाएर आएको जीप घर नजिकै पुग्दा सडकबाट १५-२० मिटर तल खसेको प्रहरीले जनाएको छ । जीप चालक प्रहरी नियन्त्रणमा छन भने दुर्घटनामा परेका उनीहरु सबै एकाघरका नातेदार रहेको बताइएको छ ।