पीसीआर रिपोर्ट नआउँदै घर पठाइएका १७ जनामा कोरोना पोजेटिभ

१ असार, दाङ । दाङ घोराहीमा १७ जनामा कोरोना पोजेटिभ भेटिएको छ। पीसीआर रिपोर्ट नआउँदै घर पठाइएका कोरोना संक्रमितको रिर्पोट पोजेटिभ आएको हो ।

घोराही उपमहानगरपालिका वडा नं. १७ स्थित चौघेरा क्वारेन्टिनमा बसेका १३ र वडा नं. १७ कै प्रावि क्वाडीमा बसेका ४ जनामा कोरोना पोजेटिभ भेटिएको हो।

घोराही उपमहानगरपालिका वडा नं. १७ स्थित चौघेरा क्वारेन्टाइनमा बसेका ३५ मध्ये १६ जनालाई जेठ २८ गते रिपोर्ट नआउँदै घर पठाइएको थियो। तर उनीहरूमध्ये १३ जनाको रिपोर्ट पोजेटिभ आएको छ ।

चौघेरा क्वारेन्टाइनमा बसेका कुल ३५ जनाको जेठ २१ गते पिसिआर टेस्टको लागि स्वाब संकलन गरिएको थियो। त्यसको दोस्रो दिन ‘जेठ २२ गते’ ६ जना आरडिटी टेस्ट गरेर घर पठाइयो।

थप १६ जनाको स्वाब संकलन गर्दा एक हप्तासम्म पनि रिपोर्ट नआएपछि जेठ २८ गते घर पठाइयो। तिनैमध्येका १३ जनामा आइतबार रिपोर्ट पोजेटिभ आएको छ ।

रिपोर्ट पोजेटिभ आएकाहरू जेठ ७, ८ र ९ गते छिमेकी देश भारतबाट आएकाहरू हुन् । १३ जना संक्रमितमध्ये १२ पुरूष र एक जना महिला छन् । त्यसैगरी वडा नं. १७ कै प्रावि क्वाडीबाट घर पठाइएका थप ४ जनामा पनि कोरोना संक्रमण पुष्टि भएको छ ।

राप्ती स्वास्थ्य विज्ञान प्रतिष्ठानमा गरिएको पिसिआर परीक्षणको रिपोर्टमा आइतबार नै घर पठाइएका १७ जनामा संक्रमण पुष्टि भए पनि सार्वजनिक गरिएको छैन। स्वास्थ्य मन्त्रालयको निर्देशिकामा १० दिनभन्दा बढी समय क्वारेन्टाइनमा बसेका र कुनै पनि लक्षण नदेखिएकाहरूलाई पीसीआर चेकजाँच नै नगरी घर पठाउन सकिने उल्लेख छ।

यसैबीच सोमबार घोराही १७ चौघेराका सर्वसाधारणले वडा कार्यालय घेराउ गरेका छन्। रिपोर्ट नआउँदै क्वारेन्टाइनबाट मानिसहरू घर पठाएको भन्दै वस्थानीयले वडा कार्यालय घेराउ गरेका हुन् । समुदायमा कोरोना संक्रमण भएको आशंका व्याप्त भएपछि गाउँका मानिसहरू त्रसित छन् ।