‘म’ ‘म’

म अनि म
त्यहीँ म:मको डल्लो जस्तै
बाहिर साधारण
भित्र तरकारी, लसुन प्याज
मरमसलाको मिश्रण जस्तै
जस्तो मम, म पनि त्यस्तै
बाहिर साधारण
मनभित्र
खुसी, सुख, शान्त, रिस, क्रोध
सबै कुराले मिश्रित।

म अनि म
अनि मदेखि मको यात्रा
जब यात्रा तय गर्छु
अनौठो जात्रै जात्रा महसुस गर्छु
जे जे आउँछ सबै स्वीकार्छु
म भित्रको अनौठो रूपमा प्रवेश गर्छु
यता हेर्छु
उता हेर्छु
जताततै सबै कुना कन्दरामा
आफ्ना आन्तरिक नजर घुमाउँछु
यो संसार महसुस गर्छु ।

शान्त, सुन्दर दुनियाँ
एकदमै सुन्दर
एकदमै लोकप्रिय
जहाँ एक सुन्दर फूलबारी छ
धेरै थरी फूलहरूको मगमग वास्ना
आहा !  अति सुन्दर
कतै खुसीका फूलहरू,
कतै प्रेमका फूलहरू
कतै सुखका त कतै शान्तिका
सबै सकारात्मकका फूलहरू
मगमग बास्ना छर्छन्
रिस, अहङ्कारलाई
त्यो बास्नाले नै मोहित बनाइदिन्छ ।
रसायन विज्ञानजस्तै
जसरी हाइड्रोजन र अक्सिजन
मिलेर पानी बन्छ
त्यस्तै छ मेरो विज्ञान पनि
जहाँ रिसको अहङ्कारलाई
खुसीको तीरले प्रहार गर्छ
खुसी र प्रेमले रिस र क्रोध पराजित गरी
शान्त र आनन्दित बनाउँछ
शितलता प्रदान गर्छ।

मलाई मदेखि मको यात्रा एकदमै मन पर्छ
शान्त, सुन्दर मको यात्रा
त्यसैले उसैको यात्रा गर्छु
उसैसँग
म अनि म ।