अख्तियारको स्टिङ अपरेशन, ८ लाख घुससहित डिल्लीबजार मालपोतका ६ कर्मचारी पक्राउ

३ असार, काठमाडौं । घुसखोरीको पर्दाफास गर्न तथा भ्रष्टाचारीलाई पक्राउ गर्नका लागि अख्तियार दुरुपयोग अनुसन्धान आयोगले स्टिङ अपरेशन गरेको छ ।

मंगलबार आयोगले काठमाडौंको डिल्लीबजारमा रहेको भूमिसुधार तथा मालपोत कार्यालयका ६ कर्मचारीलाई स्टिङ अपरेशन मार्फत घुससहित पक्राउ गरेको हो । आयोगले मालपोत अधिकृत रघुवंश कँडेलसहितका ६ जनालाई ८ लाख ५० हजार घुस रकमसहित टोखा नगरपालिका–९ सामाखुसी चोक नजिकैको स्टार पार्टी प्यालेस अगाडिबाट पक्राउ गरेको हो ।

पक्राउ पर्नेहरुमा मालपोल अधिकृत रघुवंश कँडेल, नायब सुब्बा उद्धव सापकोटा, र गोपाल खड्का खरिदार दीपक खनाल, नवराज घिमिरे, नारायप्रसाद पोखरेल रहेका छन् । लकडाउनका कारण लामो समय बन्द रहेका देशभरका मालपोत कार्यालयहरु आइतबारदेखि खुलेका थिए ।  घटनाबारे थप अनुसन्धान भइरहेको अख्तियारले जनाएको छ ।