नेपाल इन्भेष्टमेन्ट बैंकले इटालीबाट सवा अर्ब फिर्ता पायो

३ असार, काठमाडौं । नेपाल इन्भेष्टमेन्ट बैंकले इटालीको बैकबाट बैंक ग्यारेन्टी वापतको रकम फिर्ता पाएको छ ।   बैंकले बुधबार बिहान पहिलाे किस्ता वापत ८७ लाख ४९ हजार युरो निकालेकाे हो । लामाे समयपछि ठूलो रकम पाएपछि नेपाल इन्भेष्टमेन्ट बैंकलाई ठूलो राहत मिलेको छ ।

गत मंगलबार इटालीको उच्च अदालतमा क्षतिपूर्ति पाउनेगरी बैंकले मुद्दा जितेको थियो । इटालीको इन्सेटा सानपाउलो बैंकले मंगलबार बैंकलाई करिब एक अर्ब २० करोड रुपैयाँ पठाएको बैंक स्रोतले जनाएको छ ।

बैंकका प्रमुख कार्यकारी अधिकृत ज्योति पाण्डेका अनुसार अब बैंकले पाउनुपर्ने बाँकी ८५ करोड हाराहारी रकम आज साँझसम्म आइपुग्ने छ । अदालतले गरेको २० देखि ३० हजार यूरो क्षतिपूर्तिको रकम भने सीएमसी रेभिनासँग बैंकले छुट्टै दाबी गर्ने बैंकको तयारी छ ।

तनहुँ जलविद्युत आयोजनाको ठेक्का सम्झौतामा सीएमसी रेभिनाका लागि इटालीको इन्सेटा सानपाउलो बैंकका तर्फबाट काउन्टर ग्यारेन्टी जारी गर्दा नेपाल इन्भेष्टमेन्ट बैंकको एक वर्ष ९७ करोड रुपैयाँ १६ महिनादेखि फसेको थियो ।