एशियन लाईफ इन्स्योरेन्सको त्रुटिपूर्ण रिपोर्ट, प्रतिशेयर आम्दानी धेरै देखाएर ठगी ? 

७ असार, काठमाडाैं । एशियन लाईफ इन्स्योरेन्सले चालु आर्थिक वर्षको तेश्रो त्रैमासको वित्तीय विवरण निस्काशन गर्दा एउटा गम्भीर गल्ती गर्दै लगानीकर्तालाई रनभुल्ल पार्ने काम गरेको छ ।

तेश्रो त्रैमासको वित्तीय विवरण अनुसार कम्पनीको चुक्ता पुँजी २ अर्ब १ करोड रहेकोमा कम्पनीको प्रकाशित खुद मुनाफा १३ करोड ७ लाख रहेको छ । यो दुई वटा तथ्यांकलाई आधार मान्दा कम्पनीको ९ महिनाको प्रतिशेयर आम्दानी जम्मा ६ रुपैयाँ ५० पैसा हुन्छ भने वार्षिक प्रतिशेयर आम्दानी ८ रुपैयाँ ६७ पैसा मात्र हुन्छ ।

तर एशियन लाईफ इन्स्योरेन्सको प्रकाशित तेश्रो त्रैमासको वित्तीय विवरण अनुसार कम्पनीको प्रतिशेयर आम्दानी १३ रुपैयाँ ८७ पैसा देखाइएकाे छ । एशियन लाईफ इन्स्योरेन्सको प्रतिशेयर आम्दानीको सुत्र भन्दा कम्पनीको प्रतिशेयर आम्दानी ५ रुपैयाँ २० पैसा बढी देखिएको छ । धेरै लगानीकर्ताले प्रतिशेयर आम्दानीलाई हेर्ने भएकाले यसरी प्रतिशेयर आम्दानीलाई धेरै देखाउँदा कम्पनीले लगानीकर्तालाई अलमलमा पारेको हाे । याे सरासर ठगी भएकाे लगानीकर्ताकाे भनाइ छ ।

प्रतिशेयर आम्दानी निकाल्ने सुत्र सो बीमा कम्पनीका चार्टर्ड एकाउण्टेनदेखि सीईओसम्मको व्यवस्थापनले नजानेर हो वा जानाजान जनता ढाट्न गरिएको प्रपञ्च हो भन्ने बारे खुलेको छैन् । यस्तो गम्भीर गल्तीको बीमा समितिले अनुसन्धान र कारवाही गर्नुपर्ने आवाज लगानीकर्ताहरुले उठाएका छन् ।