सीडीसी ग्रुपले नेपालमा लगानी बढाउने

१० असार, काठमाडौं । बेलायती सरकारको लगानीकर्ता सीडीसी ग्रुपले नेपालमा लगानी बढाउने भएको छ । कोरोनापछिको महामारीलाई दृष्टिगत गरी बैक, इन्टरनेट र जलविद्युत्मा लगानी गरिसकेको सीडीसी ग्रुपले नेपालमा पनि लगानी बढाउने भएको हो ।

पछिल्लो १८ महिनामा एक हजारभन्दा बढी स्थानीयको रोजगारी सिर्जनाका लागि तीन क्षेत्रमा लगानी अघि बढाइसकेको छ । सीडीसीका अनुसार प्रत्यक्ष लगानीका लागि एनएमबी बैकका लागि १५ मिलियन डलर अर्थात एक अर्ब ८० करोड, इन्टरनेट प्रदायक वल्र्डलिंकका लागि १२ मिलियन डलर अर्थात १ अर्ब ४४ करोड तथा कोरियाली कम्पनीको लगानी रहेको २१६ मेगावाटको अपर त्रिशुली १ मा २१।९ मिलियन अर्थात २ अर्ब ६० करोड लगानी गरिसकेको छ ।

नेपालमा लगानी बढाउनका लागि सीडीसीले रवि रायमाझीलाई देशीय प्रतिनिधिको रूपमा नियुक्त गरेको छ । दक्षिण एसियाका धेरै मुलुकमा लगानी गरिसकेको र नेपालमा पनि भर्खर लगानी सुरु गर्न लागेको सीडीसी गु्रुपले अन्तर्राष्ट्रिय सहयोग नियोग ‘एफआईडी’ मा कार्यरत रायमाझीलाई देशीय प्रतिनिधि नियुक्त गरिएको सीडीसीले जनाएको छ ।

एफडीआईमा उनले विशेष गरी फोहोर व्यवस्थापन, जलविद्युत्, सिमेन्ट लगायतका विदेशी लगानी तथा ठूलो लगानीका आयोजनाहरूको प्रवद्र्धनका लागि लगानी बोर्डको सल्लाहकारको भूमिकामा थिए ।

रविले सीडीसी समूहमा बसेर नेपालमा धेरै पुँजी लगानीका साथै स्थानीय व्यवसायको व्यापारीकरण र व्यावसायीकरणका लागि नेतृत्व गर्ने सीडीसीले जनाएको छ । कोरोना महामारीपछिको अवस्थामा वित्तिय संकटको समाधानका लागि लगानी गरी रोजगारी र व्यवसायको सुरक्षाको लागि सीडीसीले काम गर्ने लक्ष्य राखेको छ । सीडीसी एसियाका प्रमुख श्रीनी नागरजनले रविले नेपालमा लगानीका लागि दीर्घकालीन पुँजी सहायतामार्फत व्यापार व्यवसाय अघि बढाउन ठूलो भूमिका खेल्ने बताए ।

रायमाझीले नेपालमा आफूले नेपालको वित्तिय र पूर्वाधार क्षेत्रको सुधारका लागि काम गर्ने बताउँदै विकास तथा फराकिलो अर्थतन्त्रमा वृद्धिका लागि सीडीसी केन्द्रित हुने बताए । डीएफआईडीका देशीय निर्देशक एवं कार्यवायक राजदूत बेलायती सरकारको सीडीसीले नेपालको अर्थतन्त्र विकासका लागि तथा कोरोनापछिको अवस्थामा लगानी वृद्धिका लागि सहयोग पुग्ने बताए ।