आज नेकपाको स्थायी कमिटी बैठक बस्दै, मुख्य प्राथमिकतामा ‘एमसिसी’

१० असार, काठमाडौं । नेकपा स्थायी कमिटीकाे बैठक बुधबार आज बस्दै छ । आजको बैठकमा एमसिसी परियोजनाले प्राथमिकता पाउने सम्भावना रहेको छ । प्रधानमन्त्री निवास बालुवाटारमा आज बिहान ११ बजे बस्ने बैठकका लागि राजनीतिक प्रतिवेदन नबनाइएको भए पनि एजेन्डाहरू तय भएका छन्।

बैठकको एजेन्डा तय गर्न मंगलबार प्रधानमन्त्री तथा नेकपा अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डबीच तीन घन्टाभन्दा बढी छलफल भएको थियो। यसअघि शनिबार र आइतबार पनि दुई अध्यक्षले छलफल गरेका थिए।

अध्यक्ष प्रचण्ड र अर्का नेता माधवकुमार नेपाल पक्षले एमसिसीलाई बैठकको मुख्य एजेन्डा बनाउने तयारी गरेका छन्। उनीहरू विधानअनुसार पार्टी नचलेको र सरकारका काम प्रभावकारी नभएको विषयसमेत बैठकमा उठाउने तयारीमा छन्।

एमसीसी सम्झौता संसदले पारित गर्नुपर्ने म्याद असार १७ गते सकिँदै छ सो दिन दिउँसो संसद बैठक बस्दैछ । त्यो दिन संसदले यो सम्झौता पारित गरेन र यसको म्याद पनि थपिएन भने स्वतः निश्क्रिय हुनेछ । साथै अमेरिकाले नेपाललाई दिने भनिएको ५० करोड अमेरिकी डलर अनुदान सहयोग पनि रोकिने छ ।

त्यसैले आजको  नेकपा स्थायी कमिटी बैठक महत्वपूर्ण मानिएको छ । यो बैठकले जे निर्देशन दिन्छ, सोही सर्कुलरअनुसार नै नेकपा संसदीय दलले निर्णय गर्नुपर्ने हुन्छ । स्थायी कमिटीले सम्झौता अनुमोदन नगर्ने निर्णय गरेमा केपी ओलीको अध्यक्षतामा बस्ने संसदीय दलको बैठकले सम्झौताको पक्षमा मतदान गर्ने निर्णय गर्न सक्दैन ।

एमसीसीको पक्षमा एकमत नभएपछि सुझाव दिन भन्दै नेकपाले भलनाथ खनाल, भीम रावल र प्रदीप ज्ञवाली सदस्य रहेको तीन सदस्यीय अध्ययन कार्यदल बनाएको थियो । कार्यदलको बहुमतले एमसीसी सम्झौता हुबहु पारित गर्न नमिल्ने मतसहितको प्रतिवेदन तयार पारेर पार्टी नेतृत्वलाई बुझाइसकेको छ ।