जनतालाई कोरोनाको त्रास, शीतल निवासमा राष्ट्रपतिको रात्रीभोज

१० असार, काठमाडौं । सत्तारुढ नेपाल कम्युनिष्ट पार्टीभित्र आन्तरिक संकट गहिरिंदै गर्दा राष्ट्रपति विद्यादेवी भण्डारीले सक्रियाता देखाएकी छन् । जनता कोरोना माहामारीको त्रासमा परेका बेला राष्ट्रपति भण्डारीले भने रात्रीभोजको आयोजना गरेकी हुन । कारण स्पष्ट नखुलेपनि बुधबार बेलुकी ५ बजे शीतलनिवासमा रात्रीभोजको आयोजना गरिएको नेकपाका एक नेताले बताएका छन ।

आजै नेकपाको स्थायी कमिटि बैठक बोलाइएका बेला राष्ट्रपतिको रात्रीभोजलाई महत्वका साथ हेरिएको छ । रात्रीभोजमा प्रधानमन्त्री केपी शर्मा ओली, नेकपाका अध्यक्ष प्रचण्ड, कांग्रेस सभापति शेरबहादुर देउवा लगायतका नेताहरुलाई बोलाइएको छ ।

आजको स्थायी कमिटि बैठकले एमसीसीका विषयमा बहस शुरु गर्नुका साथै नेकपाभित्रको लामो समयदेखिको असन्तुष्टि सम्बोधन गर्नेछ । सत्तारुढ नेकपाभित्रको असन्तुष्टि केही मत्थर भएका बेला ओलीले स्थायी कमिटिबाट आफू अनुकुल निर्णय गराउने योजना बनाएका छन । त्यसका लागि राष्ट्रपति भण्डारीले रात्रीभोज दिएर बैठक केही सहज पार्ने प्रयास गरिएको हुन सक्ने नेकपाका असन्तुष्ट नेताहरुको टिप्पणी छ । सत्तारुढ नेकपा भित्र शक्ति संघर्ष चर्किरहेको बेला राष्ट्रपतिले लिएको अग्रसरतालाई अर्थपूर्ण रुपमा लिइएको छ ।

आमन्त्रण गरिएका नेताहरुलाई बैठकको अजेण्डाबारे केही बताइएको छैन । तर स्रोतका अनुसार, समसामयिक विषयमा सरकारलाई सहयोग पुग्ने हिसावले बैठक बोलाइएको हो । खासगरी, अमेरिकी सहयोग अन्तर्गतको मिलेनियम च्यालेञ्ज कर्पाेरेशनमा सत्ताधारी दल भित्र चुलिएको मतान्तरलाई राष्ट्रिय अजेण्डा बनाउन नै राष्ट्रपतिमार्फत केपी ओलीले खेल खेलेको स्रोतको दावी छ ।

साथै, नेपालले जारी गरको नयाँ नक्शा र नागरिकता विधेयकबारे पनि छलफल गर्न लागिएको बुझिएको छ । नेकपा स्थायी कमिटी बैठक आजै सुरु भएको अवस्थामा राष्ट्रपतिले आह्वान गरेको बैठकले सरकारलाई राहत दिने विश्वास लिइएको छ । बैठकमा उपराष्ट्रपति, सभामुख, प्रधानन्यायधीश लगायत पूर्व प्रधानमन्त्रीहरुलाई समेत आमन्त्रण गरिएको छ ।