पाकिस्तान र भारतीय जासुसको शीतयुद्ध उत्कर्षमा, देश निकाला गर्ने होडबाजी !

१० असार, काठमाडौं । चीनसँगको सीमा विवादले तनाव बढेका बेला पाकिस्तानसँग पनि भारतको पुरानो विवाद बल्झिएको छ । पुरानै विवाद उत्कर्षमा पुगेपछि भारतले राजधानी नयाँ दिल्लीमा रहेका पाकिस्तानी उच्च आयोगका कर्मचारीलाई निष्कासन गर्ने तयारी गरेको छ ।

उच्च आयोगमा कार्यरत कर्मचारीलाई आतंकवादीसँग सम्बन्ध भएको र जासुसी गरेको आरोपमा भारतले देश निकाला गर्ने तयारी गरेको हो । यो कदम भारतले देशभित्रै मात्र होइन, पाकिस्तानमा रहेको भारतीय उच्च आयोगमा पनि अगाडी बढाएको छ । जसलाई लिएर भारत र पाकिस्तानबीचको तनाव फेरि चुलिएको आशंका गरिएको छ ।

चीनसँगको लडाईका क्रममा लद्दाखमा २० जना सैनिक गुमाएको भारतले पाकिस्तानसँग पनि पुरानै दुष्मनी थप बल्झाउने कदम चालेको विज्ञहरुको टिप्पणी छ । यद्यपी पाकिस्तानी अधिकारीबाट सुचना चुहिने डरले भारतले केही कर्मचारी र गुप्तचरको संख्या कटाएको अनुमान छ ।

भारतले यसै महिनाको शुरुवातमा दुई जना पाकिस्तानी कूटनीतिज्ञलाई देश निकाला गरेर यो कदमको शुरुवात गरेको थियो । तर फेरि उच्च आयोगमा काम गर्ने कर्मचारीलाई समेत हटाएपछि तनाव झन चुलिएको आशंका गरिएको छ ।

त्यसअघि भारतीय कर्मचारीलाई पाकिस्तानी अधिकारीले अपहरण गरेको आरोप छ । तर त्यसलाई नै अहिलेको तनावको जिम्मेवार कारण भनिएको छैन । बाहना जेसुकै भएपनि चीनविरुद्ध चालिने ठोस कदमको सुचना पाकिस्तान नपुगोस भन्ने उद्धेश्यले उनीहरुका सम्भावित खतरा मानिने जासुसी अधिकारीलाई स्वदेश फर्काइएको भारतीय सञ्चारमाध्यमले जनाएका छन ।

एजेन्सीको सहयोगमा