ओली र प्रचण्डको भाषणमै सकियो स्थायी कमिटी बैठक

१० असार, काठमाडौं । प्रधानमन्त्री तथा नेकपाका अध्यक्ष केपी शर्मा ओली र अर्का अध्यक्ष पुष्पकमल दाहाल प्रचण्डको भाषणमै सत्तारुढ नेपाल कम्युनिष्ट पार्टी नेकपाको स्थायी कमिटीको पहिलो दिनको बैठक सकिएको छ ।

सात बुँदे योजना तय गरेर शुरु भएको बैठक ओली र प्रचण्डको सम्बोधनबाट सञ्चालन भएको छ । बैठकमा वर्तमान राजनीतिक अवस्था र पार्टीका आन्तरिक विषयमा दुबै अध्यक्षले आ आफ्नो धारणा राखेका थिए । पहिलो दिनको बैठकमा सामान्य कुरा भएको र दोस्रो दिनको बैठकमा विस्तृत छलफल हुने नेकपाका प्रवक्ता नारायणकाजी श्रेष्ठले जानकारी दिए ।

लिखित दस्ताबेजमा चौथो नम्बरमा राखिएको एमसीसी एजेन्डालाई बैठकमा छैटौ स्थान दिइएको छ । सबैभन्दा पुछारको जस्तै एजेन्डा मानिएको एमसीसीमा पार्टीभित्रै आन्तरिक असन्तुष्टि बढेपछि नेकपाले स्थायी समिति बैठक बोलाएको हो ।

स्थायी समिति बैठकले एमसीसी एजेन्डा पारित गरेपछि सचिवालयले त्यसलाई अनुमोदन गर्नेछ । पार्टीभित्रै आन्तरिक समस्याका कारण एमसिसी संसदमा पेश हुन सकेको छैन ।