प्रहरी इन्स्पेक्टर नै लागुऔषध कारोबारी, ९ दिन थुनामा राख्न अनुमति

१२ असार, काठमाडौं । नेपाल प्रहरीका एक अधिकृत नै लागुऔषध कारोबारी रहेको खुलेको छ । लागूऔषध कारोबारमा संलग्न रहेको आशंकामा ललितपुर प्रहरी परिसर, जावलाखेलबाट पक्राउ परेका प्रहरी निरीक्षक रुद्र शाहीलाई हिरासतमा राख्न अदालतले अनुमति दिएको छ ।

जिल्ला अदालत, काठमाडौंले लागूऔषध कारोबार सम्बन्धी कसूरमा अनुसन्धानका लागि थुनामा राख्न इन्स्पेक्टर शाहीलाई ९ दिनकाे अनुमति दिएको हो ।

ब्युरोले बुधबार पेप्सीकोलाबाट उदयपुरका एलिसन बस्नेत, बर्दियाका सन्तोषकुमार शाह, काठमाडौंका भुपेश शेरचन र अभियान थपलियालाई लागूऔषधसहित पक्राउ गरेको थियो । उनीहरुमाथि अनुसन्धान गर्ने क्रममा घटनामा शाहीको पनि संलग्नता भेटिएपछि बिहीबार उनलाई पनि पक्राउ गरी हिरासतमा राखिएको थियो ।

 अन्य आरोपितविरुद्ध भने १० दिन म्याद थप भएको छ । प्रहरीका अनुसार शाही लागूऔषध दुर्व्यसनी भएको खुलेको छ ।ब्युरोले बुधबार पेप्सीकोलाबाट ६ सय बोतल लागुऔषध कोरेक्सस बरामद गरेको थियो । उनीहरुको साथबाट ६६७ थान डाइलेक्स बोतल, १ हजार १ सय ८६ ट्याब्लेट, स्मो प्रोक्सिभोन क्याप्सुल ३ सय ३० थान र एक लाख रुपैयाँ नगद पनि बरामद गरेको हाे ।

याे पनि :

‘ड्रग्स’ कारोबारमा सलंग्न प्रहरी इन्सपेक्टर पक्राउ

आक्रामक स्वभावका इन्सपेक्टर लागुऔषध ब्युरोको ‘अनुसन्धान’ घेरामा