स्थायी कमिटीमा ओली नआउँदा मच्चियो हल्ला

१२ असार, काठमाडौं । सत्तारुढ नेकपाले ६ महिनापछि स्थायी कमिटी बैठक बोलाएको छ । लामो समय बैठक नबस्दा धरै सदस्यलाई आफ्ना कुरा राख्न उकुसुमुकुस भएको थियो । तर असार १० गतेका लागि बैठक तय भयो । नभन्दै स्थायी कमिटीको बैठक सुरु पनि भयो । दुई अध्यक्ष केपी ओली र पुष्पकमल दाहाल प्रचण्डले आ-आफ्ना पीडा पोखे । साथै, नेता माधवकुमार नेपालले मुखको तीतो पनि राखे ।

त्यति गरेर पहिलो दिनको बैठक सकियो । आजका लागि दोस्रो अजेण्डामा छलफल गर्ने तय गरियो । सरकारको काम कारबाहीबारे समीक्षा गर्ने कार्यसूची तयार गरिएको हो । आजको बैठकमा आफ्ना कुरा राख्न शीर्ष नेताहरु मात्र होइन, स्थायी कमिटीका सदस्यहरुसमेत उत्साहित थिए । अजेण्डा पनि सरकारको कार्यशैली नै थियो । मनको तीतो मिठो सबै पखाल्ने चाहना र अभिलाषा धेरैमा रहेको थियो ।

नभन्दै आज बिहान साढे ११ बजे नेताहरु प्रधानमन्त्री निवास बालुवाटार पुगे । सबै आफ्नो तयारीका साथ गएका थिए । बैठक सुरु भयो । पार्टीका कार्यकारी अध्यक्ष पुष्पकमल दाहाल प्रचण्डले बैठकको अध्यक्षता गर्ने उद्घोष गरियो । बैठक सञ्चालनको जिम्मेवारी महासचिव विष्णु पौडेलले पाएका थिए । सोही बमोजिम बैठक प्रारम्भ भयो । त्यतिखेरसम्म बैठक स्थलमा अध्यक्षसमेत रहेका प्रधानमन्त्री ओली देखिएनन् । धेरैको कौतुहल मेटाउने काम गरे महासचिव पौडेलले ।

उनले भने–प्रधानमन्त्री ओली अन्य बैठकमा सहभागी हुनुपरेकाले कम्रेड प्रचण्डको अध्यक्षतामा बैठक सुरु गरौं, एकछिनपछि उहाँ आउनुहुने छ । महासचिवको यो जानकारीले शीर्ष नेता मात्र होइन, सदस्यहरुलाई नै निराश बनायो ।स्थायी समिति सदस्य बेदुराम भूषालले त मुखै फोडेर भने – हाम्रा कुरा सुनाउनुपर्ने मुख्य पात्र नै प्रधानमन्त्री हो । उहाँको अनुपस्थितिमा के भन्ने ?

भूषालको जिज्ञाशा मेटाउने प्रयास गर्दै प्रचण्डले भने– बैठक सुरु गर्दै गरौं, एकैछिनमा उहाँ आउनु होला, त्यतिबेलासम्म तपाईहरुले बोलेका कुरा उहाँको जानकारीमा पुु¥याइने प्रबन्ध मिलाएका छौं । आज नै सबैभन्दा महत्वपूर्ण अजेण्डामा छलफल हुँदैछ, तर प्रधानमन्त्री अनुपस्थित हुनुहुन्छ भन्दै अर्का सदस्य भीम रावलले आक्रोश पोख्दै भने भालुका अगाडि पुराण सुनाउने ?

यो नियोजित रुपमै गरिएको षडयन्त्र हो उनी भन्दै थिए– एक त बैठक नै नबोलाउने, बोलाउँदा पनि अनुपस्थित हुने ? यो के चाला हो ? तर प्रधानमन्त्री एकैछिनमा आउने जानकारी महासचिवले पुनः दिएपछि बैठकमा वरिष्ठ नेता झलनाथ खनाल बोल्ने क्रम सुरु भएको बुझिएको छ । गत बैशाख १० गते २० जना स्थायी कमिटी सदस्यले लिखित रुपमा बैठकको माग गरेका थिए ।