दुई असई, एक प्रहरी जवान निलम्बनमा

१२ असार, धनुषा । दुई जना प्रहरी सहायक निरीक्षक असईसहित तीन प्रहरी निलम्बनमा परेका छन । रौतहटको छुट्टाछुट्टै कार्यालयमा कार्यरत तीन जना प्रहरीलाई निलम्बन गरिएको प्रदेश २ का प्रमुख डीआईजी धीरजप्रताप सिंहले जानकारी दिए ।

रौतहटको इलाका प्रहरी कार्यालय पिपरा रजबाडा दरबन्दी भई प्रहरी चौकी औरैयामा कार्यरत असई ललित साह, प्रहरी जवान दिनेश हजारा र इलाका प्रहरी कार्यालय देबाही गेनाही दरबन्दी भई प्रहरी चौकी ब्रहमपुरीमा कार्यरत असई सञ्जी‍वकुमार झा निलम्बनमा परेका हुन ।

असई साह र जवान हजाराले हुण्डी कारोबारीमा संलग्न व्यक्तिलाई सघाएको प्रमाणित भएको हो । यस्तै असई झाले प्रहरी आचरणविरुद्व काम गर्दा पटक(पटक सुध्रिने मौका दिँदासमेत नसुध्रेकाले निलम्बन गरिएको सिंहले बताए । असई झा महिलाहरुसँग आपत्तिजनक अवस्थामा फेला पर्ने गरेका थिए ।