विश्वभर कोरोना संक्रमितको संख्या एक करोड नाघ्यो

१४ असार, काठमाडौं । विश्वभर कोरोना भाइरसबाट संक्रमित हुनेको संख्या एक करोड पुगेको छ। १८० दिनमा पूरै विश्वलाई कोरोनाले आफ्नो चपेटामा लिएपछि संक्रमित हुनेको संख्या एक करोड ८१ हजार ५४५ पुगेको हो ।

३१ डिसेम्बरमा विश्व स्वास्थ्य संगठनले चीनमा पहिलो पटक कोरोना भाइरस पुष्टि भएको जनाएको थियो। त्यसको तीन महिनापछि २०० भन्दा धेरै मुलुकमा कोरोना भाइरस पुगेको छ।

हामीले यो समाचार तयार गर्दासम्म कोरोनाबाट विश्वभर ५ लाख ६ सयभन्दा बढीको ज्यान गएको छ । एक करोडभन्दा बढी सङ्क्रमितमध्ये ५४ लाख ५१ हजारभन्दा बढी उपचारपछि निको भएका छन् ।

अमेरिकामा २५ लाख ९५ हजारभन्दा बढी सङ्क्रमितमध्ये एक लाख २८ हजारभन्दा बढीको ज्यान गएको छ । अमेरिकामा १ लाख ७७ हजारभन्दा बढी निको भएका छन् ।

ब्राजिलमा १३ लाख १५ हजारभन्दा बढी सङ्क्रमितमध्ये ५७ हजारभन्दा बढीको ज्यान गएको छ । ६ लाख २७ हजारभन्दा बढी सङ्क्रमित रहेको रुसमा ८ हजारभन्दा धेरैको ज्यान गएको छ ।

चौथो स्थानमा रहेको भारतमा ५ लाख २९ हजारभन्दा बढी सङ्क्रमितमा १६ हजारभन्दा बढीको ज्यान गएको छ । भारतमा ३ लाख १० हजारभन्दा बढी उपचारपछि निको भएका छन् ।