जनप्रतिनिधिहरु मैमत्ता साँढे झैः प्रेस युनियन

१४ असार, काठमाडौं । नुवाकोट जिल्लाको तारकेश्वर गाउँपालिकाको गाउँसभामा समाचार संकलन गरिरहेका पत्रकारहरुलाई यहि असार १० गते भएको दुर्व्यवहार तथा संचार सामग्री तोडफोडको घटनाप्रति नेपाल प्रेस युनियनले गम्भीर ध्यानाकर्षण भएको जनाएको छ।

त्यसैगरि विदुर नगरपालिकाको सातौं नगरसभामा नगरप्रमुख स्वयंले संचारकर्मीमाथि दुर्व्यवहार गरेको घटना समेत निन्दनीय भएको युनियनका महासचिव अजयबाबु शिवाकोटीले आज एक विज्ञप्तिमार्फत जनाएका छन् । गाउँगाउँमा सिंहदरवार भनिएसँगै स्थानिय तहहरुमा अधिकार र जवाफदेही दुबै बढेको उल्लेख गर्दै सो विज्ञप्तिमा अधिकारप्राप्त स्थानिय तहका जनप्रतिनिधिहरुको यस्ता व्यवहार अधिकार पाएका तर जवाफदेहीका कुनै पनि ख्याल नगर्ने मैमत्ता साँढे झैं देखिएको महासचिव शिवाकोटीले उल्लेख गरेका छन् ।

गाउँगाउँमा सिंहदरवार पुग्नुको मतलव कोहि पनि अधिकार प्राप्त अधिकारी सिंह जस्तै बन्नु हैन बरु जवाफदेही र जिम्मेवारी बहन गर्ने विनयी हुनु हो भन्ने कुरा जनप्रतिनिधिहरुले बुझ्न जरुरी भएको महासचिव शिवाकोटीले विज्ञप्तिमा उल्लेख गरेका छन् ।

युनियन सबै जनप्रतिनिधिहरुलाई संकटको यो समयमा पनि संचारकर्म गरिरहेका संचारकर्मीहरुलाई भयरहित वातावरणमा समाचार संकलन र संप्रेषणमा सहजीकरण गर्न अपिल गर्दै संचारसामग्री तोडफोड भएका संचारकर्मीहरुलाई उचित क्षतिपूर्तिको माग गरिएको छ ।