क्वारेन्टाइनमै थप एक जनाको मृत्यु, कोरोना पुष्टि हुन बाँकी

१४ असार, नवलपरासी । पश्चिम नवलपरासीको बर्दघाटमा क्वारेन्टिनमा एक जनाको मृत्यु भएको छ । बर्दघाट नगरपालिका–२ स्थित दिव्यज्योति बहुमुखी क्याम्पसको क्वारेन्टिनमा बसेका करिब ४५ वर्षीय पुरुषको बिहानै मृत्यु भएको हो ।

उनको कोरोना रिर्पोट आउन भने बाँकी छ । नगरपालिकाका स्वास्थ्य शाखा प्रमुख माधव ज्ञवालीका अनुसार शनिबार राति साढे १२ बजेको समयमा अचानक स्वास्थ्यमा समस्या आएपछि उनलाई उपचारका लागि लुम्बिनी प्रादेशिक अस्पताल बुटवल लगिएको थियो ।

उनको उपचारकै क्रममा मृत्यु भएको हो । भारतबाट आएका उनी मुटु र मधुमेह रोगी थिए ।