आज बजार फर्केको देख्दा लगानीकर्ता दङ्ग, आजको प्राविधिक विश्लेषणले के देखायो ?

१५ असार, काठमाडाैं । निकै लामो समयदेखि बन्द शेयर बजार आज असार १५ गतेबाट खुलेको छ । धेरै लगानीकर्ताले सोचे बमोजिम बजार आज “क्र्यास” हुने भनिएपनि १ बजेबाट भने धेरै लगानीकर्ताको सोच विपरित बजारले सकारात्मक ट्रेन्ड समातेको थियो ।

तर अन्तिम समयमा भने अर्थात बजार बन्द हुनु भन्दा ३० मिनेट अघि बजारले पुन थोरै बिक्रीकर्ता हावी भएका थिए । आजको बजारको ग्राफ हेर्दा भोली बजारले १२०० को प्रतिरोध क्षेत्रलाई तोड्नु पर्ने देखिन्छ । १२०० को क्षेत्र एउटा मनोवैज्ञानिक प्रतिरोध हो भने आजको बजारले पनि सो क्षेत्रलाई प्रतिरोध भनेको छ । त्यस्तै बजारले ११५० को टेवा बनाएको छ।

बजार आज १ दशमलव ०७ प्रतिशतले घट्दै ११८८ दशमलव ७० को विन्दुमा बन्द भएको छ । दोश्रो बजार परिसूचकमा  १२ दशमलव ८७ विन्दुको गिरावट आएको छ । आज नेप्सेको अनलाइन कारोवार प्रणालीले भने राम्रोसँग काम नगरेको भन्दै लगानीकर्ताले सामाजिक संजालमा चर्को विरोध जनाएका थिए । टीएमएसले राम्रोसँग काम नगरे पनि आज ४८ करोड माथिको शेयर कारोवार गर्न दोश्रो बजार सफल भएको छ।

आज बजार ११९७ दशमलव ०९ को विन्दुमा खुलेतापनि बजार १२ बजेर १४ मिनेटमा न्यून विन्दु समातेको थियो । आज बजारले ११४९ दशमलव ५५ को न्यून विन्दु समातेको थियो । त्यस्तै बजारले २ बजेर ३८ मिनेट जाँदा १२०० दशमलव ७५ को उच्च विन्दु समातेको थियो ।

नेपाल लाईफ इन्स्योरेन्सको सर्वाधिक ३ करोड ५७ लाखको शेयर कारोवार भएको छ भने हिमालयन डिष्ट्रिलरीको शेयर कारोवार ३ करोड ४६ लाखको भएको छ।

आज नागरिक लगानीकोषको सर्वाधिक बजार मूल्य ९ दशमलव ९९ प्रतिशतले वृद्धि भएको छ भने हिमालयन डिष्ट्रिलरीको बजार मूल्य सर्वाधिक ९ दशमलव ९६ प्रतिशतले वृद्धि भएको छ। आज ४ कम्पनीको बजार मूल्य ४ प्रतिशत भन्दा धेरैले वृद्धि भएको छ।

त्यस्तै स्वावलम्बन लघुवित्तको शेयर मूल्य सर्वाधिक ९ दशमलव ९९ प्रतिशतले घटेको छ भने नेपाल पुनर्बीमाको पहिलो दिनको कारोवारमा नै बजार मूल्य ९ दशमलव ९९ प्रतिशतले घटेको छ।

आज ट्रेडिङ्ग उपसूचकमा सर्वाधिक ५ दशमलव २४ प्रतिशतको वृद्धि देखिएको छ भने विकास बैंक उपसूचकमा सर्वाधिक ३ दशमलव ७४ प्रतिशतको गिरावट आएको छ । बजारलाई ड्राईभ गर्ने वाणिज्य बैंक उपसुचकमा पनि २ दशमलव ४२ प्रतिशतको गिरावट आएको छ ।

प्राविधिक विश्लेषण :
तीन महिनापछि आज खुलेको बजारको प्रवृत्तिले कारोबारको पहिलो समयमा विक्रेताको चाप रहेपनि पछिल्लो समयमा क्रेता हावी रहेको संकेत गरेको छ । आजको मैनबत्तीले “हतौडा” चित्र बनाएको छ । यो बलियो टेवा क्षेत्रमा बनिएको हतौडा आकृतिलाई “बुलिस पीन बार” भन्ने पनि गरिन्छ । दैनिकी अवधिमा “आरएसआई” ३१ दशमलब ०१ को बिन्दुमा छ ।

यो अक्सिलेटरले बजारको निश्चित दिशा तय गरेको देखिन्दैन । “एडिएक्स” तथा जोड-बिजोड “डाइरेक्सनल इन्डेक्स”हरुले बजारमा हालसम्म विक्रेताको चाप रहेको जानकारी गरेको छ। “अन ब्यालेन्स भल्यूम” ले बजारको प्रवृत्तिमा परिवर्तन हुने संकेत गरेको देखिन्दैन ।

नोट : निर्णय लग्नु अघि थप अनुसन्धान गर्नु होला ।