आँधीखोलाले सलह समातेर ल्याए प्रति किलो तीन सय दिने

१६ असार, स्याङ्जा । स्याङ्जाको आँधीखोला गाउँपालिकाले सलह छोपेर ल्याउन आह्वान गरेको छ । भारतबाट नेपालका विभिन्न भू–भाग हुँदै पाल्पाबाट सलह किरा स्याङ्जा प्रवेश गरिसकेको जनाउँदै सलह किरा समातेर ल्याए प्रति किलो तीन सय रुपैयाँ दिने समेत गाउँपालिकाले घोषणा गरेकाे छ ।

गाउँपलिकाका निमित्त प्रमुख प्रशाकीय अधिकृत गेदुराम ढकालले सूचना जारी गर्दै प्रति किलोका हिसाबमा रकम दिने निर्णय भएको उल्लेख गरेका छन् । उनले आँधीखोला गाउँपालिकाको वडा नंं १ पञ्चमुलमा समेत सलहको झुण्ड देखिएको उल्लेख गर्दै सबैलाई सजग रहन भनेका छन् ।

सलह किरा नेपालमा शनिबारबाट देखिएको थियो । सलहबाट हुने क्षति कम गर्न आगो बाल्ने, धुँवा गराउने, हावाको बहाव परिवर्तन गराउने, थाल ठटाउने, ड्रम बजाउने, स्पीकर लगाउने कार्यहरु गरी प्रकोपलाई न्यूनिकरण गर्न गराउनुहुन आँधीखोलावासीमा उनले अनुरोध गरेका छन् ।