ओलीले एमाले ब्युताउन लागेको बामदेवको आरोप

१६ असार, काठमाडौँ । सत्तारुढ नेपाल कम्युनिष्ट पार्टी नेकपाका उपाध्यक्ष बामदेव गौतमले प्रधानमन्त्री केपी शर्मा ओलीले एमाले ब्युताउन लागेको आरोप लगाएका छन । पार्टी स्थायी समिति बैठकमा बोल्दै बामदेवले आफू प्रधानमन्त्री पदमा रहिरहनका लागि नेकपा फुटाएर एमाले ब्युताउन लागेको आरोप लगाएका हुन ।

ओलीले झापाकी सन्ध्या अधिकारीलाई नेकपा एमाले पार्टी दर्ताका लागि निर्वाचन आयोगमा निवेदन दिन लगाएको बामदेवको आरोप छ । प्रधानमन्त्री ओलीकै निर्देशनमा अधिकारीले निर्वाचन आयोगमा दल दर्ताका लागि निवेदन दिएको पनि बामदेवको दाबी छ । ओली र एमाले पार्टी दर्ताका लागि निर्वाचन आयोगमा निवेदन दिने सन्ध्या अधिकारी झापाकै हुन ।

मंगलबार स्थायी समिति बैठकमा बोल्ने १७ जनामध्ये १२ जना नेताहरुले प्रधानमन्त्री ओलीको राजीनामा माग गरेका थिए । १२ जना नेतामध्ये ओलीको राजीनामा माग गर्नेमा बामदेव पनि हुन । बामदेवसँगै ओलीको राजीनामा माग गर्नेमा अर्का अध्यक्ष प्रचण्ड, बरिष्ठ नेता झलनाथ खनाल, माधव कुमार नेपाल, नारायणकाजी श्रेष्ठ, गणेश शाह लगायतका नेताहरु छन ।

ओलीले प्रधानमन्त्रीसँगै पार्टी अध्यक्ष पदबाट पनि राजीनामा दिनुपर्ने नेताहरुको माग छ । त्यसमाथि ओलीकै निर्देशनमा नेकपा एमाले दर्ताका लागि निर्वाचन आयोगमा निवेदन परेपछि नेताहरुले राजीनामा माग चर्काएका छन ।