एट्लेटिकोसँग पनि बराबरीमा रोकियो बार्सिलोना, ला लिगा उपाधि फुत्किदै

१७ असार, काठमाडौं । एट्लेटिको मड्रिडसँग पनि बराबरीमा रोकिएपछि बार्सिलोनाको उपाधि होडमा गम्भिर धक्का लागेको छ । बुधबार बिहान भएको खेलमा बार्सिलोना एट्लेटिको मड्रिडसँग दुई दुई गोलको बराबरीमा रोकिएको हो ।

मेस्सीले करियरको ७ सयौँ गोल गरेपनि टिमलाई जिताउन सकेनन् । एट्लेटिकोलाई हारबाट जोगाउन दुबै गोल पेनाल्टीमार्फत सिउल निगुइजले गरे । त्यसअघि खेल शुरु भएको ११ औँ मिनेटमै डियगो कोष्टाले आत्मघाती गोल गर्दा बार्सिलोनाले अग्रता लिएको थियो ।

तर त्यसको ८ मिनेटमै एट्लेटिकोले बराबरी गोल फर्कायो । दोस्रो हाफको ५० औँ मिनेटमा मेस्सीले करियरको ७०० औँ गोल गरेर टिमलाई अग्रता दिलाएका थिए । तर फेरि एट्लेटिकोका सिउलले ६२ औँ मिनेटमा पेनाल्टीमार्फत बराबरी गोल फर्काए ।

त्यसपछि दुबै टोलीले केही राम्रा अवसर पाएपनि गोल गर्न सकेनन् । बराबरीसँगै ला लिगाको उपाधि बार्सिलोनाको हातबाट लगभग फुत्किएको छ । ३३ औँ खेलबाट ७० अंक जोडेको बार्सिलोना दोस्रो स्थानमा छ भने ५९ अंक जोडेको एट्लेटिको तेस्रो स्थानमा छ ।

एक खेल कम खेलेको रियलको ७१ अंक छ । अब उसले बाँकी खेल जितेसँगै बराबरी गरेपनि ला लिगा उपाधि जित्नेछ । अब बार्सिलोनाले उपाधि हात पार्न बाँकी खेल जितेर मात्रै पुग्दैन, रियल कम्तीमा दुई खेलमा पराजित हुनुपर्नेछ ।

उपाधि होडमा रहेको रियल सजिलै हार्ने पक्षमा छैन । जसकारण दुई अंक गुमाएको बार्सिलोनालाई ठूलो घाटा लागेको छ ।