अजोड इन्स्योरेन्सले ३० करोडको आईपीओ जारी गर्दै, असार २५ गतेदेखि २९ सम्म किन्न पाईने

१७ असार, काठमाडौं । सम्भवत सबैभन्दा कान्छो निर्जीवन बीमा कम्पनी अजोड इन्स्योरेन्सले साधारण शेयर जारी गर्न लागेको छ । पछिल्लो समय निर्जीवन बीमा व्यवसाय गर्न स्वीकृत प्राप्त बीमा कम्पनीहरु मध्ये अजोडले सबैभन्दा पहिला सर्वसाधारणमा शेयर जारी गर्न लागेको हो ।

कम्पनीले यही असार २५ गतेदेखि साधारण शेयर अर्थात आईपीओ निश्काशन गर्ने सुचना जारी गरेको छ ।

कम्पनीले १०० रुपैयाँ अंकित दरका ३० लाख कित्ता शेयर जारी गर्ने जनाएको छ । कुल ३० करोडको शेयर जारी गरेपछि कम्पनीको चुक्ता पुँजी एक अर्ब रुपैयाँ पुग्ने छ।

कम्पनीले ३० लाख कित्ताको ४ प्रतिशत अर्थात एक लाख २० हजार कित्ता शेयर कर्मचारीका लागि छुट्याएको छ । यसैगरी अर्को ५ प्रतिशत शेयर सामूहिक लगानी कोषका कम्पनीहरुलाई छुट्याएको छ । बाँकी रहेको २७ लाख ३० हजार कित्ता शेयर भने सर्वसाधारणका लागि जारी हुनेछ ।

कम्पनीको शेयरमा कम्तिमा १० कित्ता र बढीमा १० हजार कित्ताका लागि आवेदन दिन पाइनेछ । आवेदन २९ गतेभित्र दिइसक्नु पर्छ । कम्पनीको बिक्री प्रबन्धकमा एनआईबीएल एस क्यापिटल रहेको छ।