प्रधानमन्त्री पद जोगाउन ‘संकटकाल’ लगाउन सक्छन ओली

१७ असार, काठमाडौं । पार्टीभित्रैबाट एकैस्वरमा राजीनामा माग्न थालिएपछि नेकपाका अध्यक्ष केपी शर्मा ओलीको प्रधानमन्त्री पद संकटमा छ । पार्टीको सर्वशक्तिमान सचिवालय, स्थायी समिति, केन्द्रीय समितिमा अल्पमतमा रहेका प्रधानमन्त्री ओलीलाई अब पार्टीको निर्देशन बेवास्ता गर्दा पद जोगाउने एउटै उपाय संकटकाल हो । प्रधानमन्त्री ओलीको संसदीय दलमा मात्र बहुमत रहेकाे छ ।

पछिल्लो समय पार्टीबाट चौतर्फी आक्रमण बढेपछि प्रधानमन्त्री ओलीको आश भरोसा राष्ट्रपति विद्या भण्डारीमाथि मात्रै छ । मंगलबार स्थायी समिति बैठक चलिरहँदा पनि उनी राष्ट्रपतिलाई भेट्न शीतल निवास पुगेका थिए । सम्भवतः उनले दुई तिहाई बहुमतको आडमा बनेको सरकार टिकाउन संकटकाल लगाउने तयारीबारे सोच्दैछन ।

पार्टीले राजीनामा दिनुपर्ने बहुमतले निर्णय गरेर प्रधानमन्त्री पदबाट राजीनामाकाे निर्देशन दिने संभावना अधिक छ । त्यसो हुँदा ओलीलाई पद छाड्नुको विकल्प छैन । यस्तो अवस्थामा कोरोना महामारी कारण देखाएर संकटकाल स्वभाविक हुन्छ । त्यसैले पनि ओलीले अबको सम्भावित एउटा कदमका रुपमा सेना परिचालनबारे सोच्न सक्छन ।

राष्ट्रपति र रक्षामन्त्री आफ्नै विश्वास पात्र भएकाले पनि ओलीलाई संकटकाल लगाउन त्यत्ति गाह्रो छैन । रक्षामन्त्री ईश्वर पोखरेलको समर्थन लिएर राष्ट्रपति भण्डारीबाट सेना परिचालन गराउन ओलीलाई आइतबार कुर्नुपर्दैन ।

तर यो ओलीका लागि नै घातक हुने राजनीतिक विश्लेषकहरुको टिप्पणी छ । पार्टीले प्रधानमन्त्री बनाएकाले पार्टीले छोड भन्दा राजीनामा दिनुको विकल्प ओलीसँग छैन । तर यत्तिकै राजीनामा दिने पक्षमा ओली छैनन् ।