नेपालका २ हजार बालबालिकामा कोरोना संक्रमण

१७ असार, काठमाडौं । नेपालमा पछिल्लो समय बालबालिकामा पनि कोरोना संक्रमण बढ्दै गएको छ । स्वास्थ्य तथा जनसंख्या मन्त्रालयका अनुसार अहिलेसम्म २ हजार ६१ बालबालिकामा कोरोना संक्रमण पुष्टि भएको छ ।

उनीहरु सबै १८ बर्षभन्दा मूनिका छन । त्यसमध्ये सुदुरपश्चिममा मात्रै कम उमेरका बालबालिकामा संक्रमण छ । सुदुरपश्चिममा १ सय ७५ जना बालबालिका ९ बर्षभन्दा कम उमेरका छन ।

उमेरका हिसाबले उनीहरु उच्च जोखिममा रहेका मन्त्रालयका प्रवक्ता जागेश्वर गौतमले बताए । उनका अनुसार सुदुरपश्चिमका संक्रमित बालबालिका सबै भारतबाट आमाबुवासँगै आएका हुन ।

नेपालमा अहिलेसम्म १४ हजार बढीमा कोरोना संक्रमण पुष्टि भएको छ । त्यसमध्ये ४ हजार ६ सय बढी उपचारपछि निको भएर घर फर्किएका छन भने ३० जनाको मृत्यु भएको छ । ज्यान गुमाउनेमा दुई बर्षीया बालिका समेत छन ।