नेपाली कांग्रेस बीपीले संसद भवन अगाडि जलायो ओली र देउवाको पुत्ला

१७ असार, काठमाडौं । एमसीसीको विरोधमा नेपाली कांग्रेस बीपीले संसद भवन अगाडि प्रधानमन्त्री केपी शर्मा ओली र कांग्रेस सभापति शेरबहादुर देउवाको पुत्ला जलाएको छ । नेपालमा अमेरिकी राष्ट्रघाती एमसीसी परियोजना ल्याउन मुख्य भूमिका खेलेको भन्दै नेपाली कांग्रेस बीपीले ओली र देउवाको पुत्ला जलाएको हो ।

देउवा प्रधानमन्त्री भएको बेला अर्थमन्त्री ज्ञानेन्द्र कार्कीले अमेरिकामा एमसीसीसँग सम्झौता गरेका थिए । जुन परियोजना अहिले ओली प्रधानमन्त्री हुँदा नेपालमा लागु गर्न खोजिदैछ । तर त्यो सम्झौता अवैधानिक रहेको नेपाली कांग्रेस बीपीका महामन्त्री शुशिलमान शेरचनले बताएका छन्।

ओली र देउवाको पुत्ला जलाउने क्रममा दुई जना पक्राउ परेका छन । तरुण दल बीपीका केन्द्रीय अध्यक्ष प्रधुम्नजंग कार्की र नेविसंघ बीपी नुवाकोटका अध्यक्ष शुशिल वाग्ले पक्राउ परेका हुन । अहिलेसम्म बानेश्वरको निषेधाज्ञा कसैले तोड्न नसकेकोमा संसद भवन अगाडि गएर पहिलोपटक पुत्ला जलाइएको महामन्त्री शेरचनले बताए ।