प्रचण्ड-माधवको पक्षमा ३१ स्थायी समिति सदस्य, ओलीलाई राजीनामा दिन दबाब !

१७ असार, काठमाडौं । नेकपाका अध्यक्ष प्रचण्ड र बरिष्ठ नेता माधव कुमार नेपालसहितको झम्सीखेल भेलाले प्रधानमन्त्री तथा नेकपाका अध्यक्ष केपी शर्मा ओलीलाई दुवै पदबाट राजीनामा गराउने निष्कर्ष निकालेको छ ।

झम्सीखेलमा प्रचण्ड, माधव नेपाल, झलनाथ खनाल, बामदेव गौतम, नारायणकाजी श्रेष्ठ लगायतका बहुमत नेताहरुले ओलीलाई दुवै पदबाट राजीनामा गराउने निष्कर्ष निकालेका हुन ।

यसका लागि शुरुमा ओलीलाई पार्टीका सबै निर्णयहरु अक्षरंश पालना गराउने भेलाको निष्कर्ष छ । भेलामा नेकपाका नेतासहित ३१ जना स्थायी कमिटी सदस्य सहभागी थिए । सबैले ओलीको विरुद्धमा जाने निर्णय गरेका छन ।

स्थायी कमिटीमा ४४ सदस्यमध्ये ३१ जना सदस्य प्रचण्ड र माधव नेपालको पक्षमा उभिएपछि ओली स्थायी कमिटीमा स्पष्ट रुपमा एक्लिएका छन । उनका पक्षमा अब १३ सदस्य मात्रै छन । स्थायी कमिटी बैठकमा पनि मंगलबार र बुधबार मात्रै बोलेका झण्डै २५ जना नेताहरुले ओलीको राजीनामा माग गरेका थिए ।

बिहान बालुवाटारमा ओलीको पक्षमा देखिएका मन्त्री तथा स्थायी कमिटी नेताहरु रामबहादुर थापा बादल, लेखराज भट्ट, मणि थापा, टोपबहादुर रायमाझी, धनश्याम भुसाल र योगेश भट्टराई पनि अन्ततः प्रचण्ड माधव नेपाल पक्षमा उभिएका छन ।

यसले ओलीलाई नेकपाभित्र झन तनाव दिएको छ । यसै पनि स्पष्ट रुपमा अल्पमतमा परेर राजीनामा दिने अन्तिम बिन्दुमा पुगेका ओलीलाई झम्सीखेल भेलाले अब निर्णायक बिन्दुमा पुर्याएको छ ।