आज शान्ति प्रक्रियाका महानायक गिरिजाप्रसाद कोइरालाको ९७ औं जन्मजयन्ती

१८ असार, काठमाडाैं । पूर्वप्रधानमन्त्री एवम् नेपाली राजनीतिका शिखर पुरूष, शान्ति प्रक्रियाका महानायक, नेपाली कांग्रेसका पुर्व सभापति नेता स्व. गिरिजाप्रसाद कोइरालाको ९७ औं जन्मजयन्ती बिहीबार बिभिन्न कार्यक्रम गरि मनाइदै छ ।

२०६२/६३ सालको जनआन्दोलनका नायक तथा सफल राजनेता कोइरालाको विसं १९८१ असार १८ गते भारतको बिहारस्थित सहर्सा जिल्लामा जन्म भएको थियो । कोइरालाका बुवा कृष्णप्रसाद कोइरालालाई तत्काकालिन राणा शासकहरुले निर्वासनमा पठाएका बेला भारतमै उनको जन्म भएको हो ।

उनको ८६ बर्षको उमेरमा २०६६ साल चैत ७ गते निधन भएको थियो । नेपाली कांग्रेसको नेतृत्व र प्रधानमन्त्रीका रुपमा सबैभन्दा धेरै पटक देशको नेतृत्व गरेका कोइरालाले पछिल्लो समय देशमा गणतन्त्र स्थापनाका लागि खेलेको भूमिका सबैका लागि स्मरणीय छ ।

उनी २०४८ साल जेठ १२ गते नेपालको निर्वाचित प्रधानमन्त्री बनेका थिए । २०५३ सालमा सम्पन्न नवौं महाधिवेशनबाट उनी पहिलोपटक नेपाली कांग्रेसको सभापति चयन भए । २०५७ सालमा उनी दोस्रोपटक पार्टी सभापति चयन भएका थिए । जनआन्दोलनपछि उनले राष्ट्रप्रमुख र सरकार प्रमुख दुवैको कार्यभार सम्हाल्ने मौका पाएका थिए ।

उनको सार्थक पहलमा नै सशस्त्र संघर्षमा रहेको एकिकृत नेकपा माओवादी शान्ति प्रक्रियामा सहभागि भई संविधान सभा निर्वाचनमा गएको थियो । उनकै नेतृत्वमा माओवादी र सात राजनीतिक दलहरुबीच २०६३ मंसिर ५ गते १२ बुँदे समझदारी भएको थियो । अहिले पनि एमाओवादीका अध्यक्ष पुष्पकमल दाहालले पटकपटक मुलुकमा गिरिजाबावुको आवश्यकता रहेको बताउँदै आएका छन् । २००३ सालमा विराटनगरमा मजदूर आन्दोलन गर्दागर्दै उनमा राजनीतिक चेतना जागरुक भएको थियो ।

तर यस पटक विश्वभर फैलिएको कोरोना भाइरसको महामारी र सरकारले लागु गरेको लकडाउनका कारण भव्य कार्यक्रमको आयोजना नगरेको नेपाली कांग्रेसले जनाएको छ । यदपि सामाजिक दुरी कायम गरेर कोइरालाको ९७ औं जन्मजयन्तीका अवसरमा भावपूर्ण श्रद्धासुमन अर्पणको कार्यक्रम सबै जिल्लाहरुमा गरिने छ ।