कांग्रेसले भन्यो- परामर्श नगरी अधिवेशन अन्त्य गरिनु दुःखद !

१८ असार, काठमाडौं । नेपाली कांग्रेसले संघीय संसदका दुवै अधिवेशन अचानक अन्त्य गरिनु दुःखद भएको भन्दै आपत्ति जनाएको छ । कांग्रेस प्रवक्ता विश्वप्रकाश शर्माले प्रेस विज्ञप्ति जारी गर्दै सत्तारुढ दलभित्रको द्वन्द्वको किचलोले संसदको अधिवेशन अन्त्य गर्नु दुःखद भएको बताएका हुन ।

प्रमुख प्रतिपक्षी दलसँग एकपटक पनि परामर्श नगरी संसद अधिवेशन अन्त्य गर्नु आपत्तिजनक भएको पनि कांग्रेसको भनाई छ । जनताको जीवन बनाउने कि सत्ताको राजनीतिमा अल्झिने भन्दै कांग्रेसले हठात दुबै सदनको अधिवेशन अन्त्य गर्नु दुःखद र आपत्ति जनक भएको बताएको हो ।

मन्त्रिपरिषद बैठकले बिहीबार दिउँसो संघीय संसदमा दुबै अधिवेशन अन्त्य गर्ने निर्णय गरेको हो । सरकारको सिफारिस राष्ट्रपतिले अनुमोदन गरेपछि संसदको अधिवेशन आजैदेखि अन्त्य भएको छ ।