स्वास्थ्य मन्त्री ढकालको दवावपछि निर्देशक पोखरेलले दिए राजीनामा

१८ असार, काठमाडौं । स्वास्थ्य बीमा बोर्डका कार्यकारी निर्देशक रमेशकुमार पोखरेलले पदबाट राजीनामा दिएका छन्। पोखरेलले बुधबार प्रधानमन्त्री तथा मन्त्रिपरिषदको कार्यालयमा राजीनामा बुझाएको बताए ।

उनलाई पदबाट हटाउन स्वास्थ्य तथा जनसंख्या मन्त्रालयकाे एउटा टीम नै लागेकाे र त्यसमा मन्त्री भानुभक्त ढकालकाे पनि माैन समर्थन रहेपछि पाेखरेलले राजीनामा गरेका हुन् ।

राजीनामा पत्र स्वास्थ्य तथा जनसंख्या मन्त्री, राज्यमन्त्री लगायतलाई बोधार्थ दिइएको छ । खुल्ला प्रतिस्पर्धामार्फत छनौट भएका पोखरेललाई लोक सेवा आयोगको सिफासिमा मन्त्रिपरिषद्ले १८ महिना अघि नियुक्त गरेको थियो । उनको कार्य अवधि चार वर्षको थियो ।

पोखरेल स्वास्थ्य बीमा बोर्डमा २०७५ मंसिर २३ मा नियुक्त भएका थिए । तर पुस लागेर मात्रै उनले जिम्मेवारी सम्हालेका थिए । सरकारको महत्वकांक्षी योजनामा स्वास्थ्य बीमा कार्यक्रम परेको छ । चालु आर्थिक वर्षका लागि यो कार्यक्रममा करिब ७ अर्ब रकम विनियोजन भएकाे छ ।