नेकपा भित्र सहमति होला ?

१९ असार, काठमाडौं । सत्ताधारी नेपाल कम्युनिष्ट पार्टीको जारी स्थायी कमिटी बैठकले संभवतः हिजो साँझ प्रधानमन्त्रीसमेत रहेका पार्टी अध्यक्ष केपी ओलीलाई दुबै पदबाट तत्काल राजीनामा गर्न निर्देशन दिनेवाला थियो । यसबारे जानकार ओलीले बिहानैदेखि नयाँ रणनीति बनाए ।

११ बजेका लागि निर्धारित स्थायी कमिटी बैठक जारी राख्न सहमति मात्र जनाएनन् बरु बजारमा चलेको हल्ला अनुसार संसद् बैठक स्थगित गर्ने कुराको खण्डनसमेत गरे । पार्टीका अर्का अध्यक्ष पुष्पकमल दाहाल प्रचण्डले फोन गरी यसबारे बुझ्न खोज्दा ओलीले यस्तो कुरा बताएका हुन् ।

प्रधानमन्त्रीले यति बोलीसकेपछि प्रचण्डले माधवकुमार नेपाल, झलनाथ खनाल र बामदेव गौतमलाई यसबारे जानकारी गराए । साथै, स्थायी कमिटी बैठकमा सहभागी हुन १० बजे नै बालुवाटार पुगिसकेका थिए । विस्तारै नेताहरु आउनेक्रम जारी थियो । तर प्रधानमन्त्री ओली भने बैठक बस्नै लाग्दा शीतल निवासतिर निस्किए ।

यसबारे थप जानकारी लिन प्रचण्डले ओलीलाई फोन गरे । ओलीले सामान्य परामर्शका लागि मात्र शीतल निवास गएको भन्दै बैठक जारी राख्न अह्राए । लगभग एक घण्टापछि नेता नेपालले बैठक कक्षमा नयाँ जानकारी आयो है साथीहरु भने । प्रधानमन्त्रीले त संसद् अधिवेशन अन्त्य गर्न राष्ट्रपतिलाई सिफारिश गर्नु भएछ, अब के गर्ने भन्दै तत्कालका लागि बैठक स्थगित गरेर थप स्पष्ट हुन आवश्यक रहेको बताए । लगत्तै नेताहरुले ओलीसँग बार्ता गर्न प्रचण्डलाई भने । प्रधानमन्त्रीसँग प्रचण्डले करिब आधा घण्टा कुरा गर्दा संसद्मा बिजनेश नभएकाले अन्त्य गर्नुपरेको बताए ।

कतै फेरि राजनीतिक दल सम्बन्धी अध्यादेश ल्याउन लाग्नु भएको त होइन भनी प्रचण्डले प्रश्न गर्दा ओलीले तीन चार दिन यता नल्याउने बताए । ओलीसँगको कुराकानीबारे प्रचण्डले शीर्ष नेताहरुसँग थप छलफल गर्दा तत्काल राष्ट्रपतिलाई भेटेर ओलीले अध्यादेश सिफारिश गरे नगरेको बुझ्न पठाउने निर्णय भयो । राष्ट्रपतिसँगको कुराकानीका प्रचण्डले त्यस्तो कुनै अध्यादेश नआएको जानकारी पाए । तर भोलि सिफारिश भयो भने संविधान बमोजिम चल्नुपर्ने धारणा राखेकी थिइन् ।

हतार हतार प्रचण्ड बालुवाटार फर्किएर सबै बेलीबिस्तार लगाए । त्यसपछि नेताहरु बिखलबन्धमा परे । के गर्ने नगर्ने भन्ने अन्यौल थपियो । स्थायी कमिटीबाट प्रधानमन्त्री ओलीलाई राजीनामा गर्न निर्देशन दिने हो भने दल बिभाजनसम्बन्धी अध्यादेश जारी हुने अवस्था देखियो । त्यसैले नेताहरु बैठक स्थगित गरेर नयाँ रणनीति बनाउन व्यस्त छन् ।

भोलिका लागि सारिएको स्थायी कमिटी अगावै घनिभूत वार्ता गरी निकास पहिल्याउने प्रयत्न भइरहेको छ । तर दुबै पक्ष टसका मस हुने अवस्थामा छैनन् । नेकपा यतिबेला अनिर्णयको बन्दी जस्तो बनेको छ । ओलीमाथि कारबाही गर्ने हो भने पार्टी फुट्ने डर , नगर्ने हो भने ओली हैकम अझै पराकाष्ठामा पुग्ने भय । बढो असामान्यजस्य अवस्थामा पुगेको छ अहिले नेकपा ।

ओली र प्रचण्ड पक्षमा देखिएको दुबै पक्षले अडान नछाड्ने हो भने अब नेकपालाई फुट्नबाट कसैले जोगाउने अवस्था छैन । यद्यपि दोस्रो तहका नेताहरु भने नेताहरुबीचको कटुता र बैमनस्यता दूर गर्न कसरत गरिरहेका छन् । तर अवस्था भने उनीहरुको प्रयत्नले नियन्त्रणमा लिने भन्दा धेरै पर पुगिसकेको छ ।

आज बिहानैदेखि कृषि मन्त्री घनश्याम भूषालले पार्टीका दोस्रो तहका नेताहरुलाई भेला गराएका छन् । दुबै खेमामा विभक्त नेताहरु सहभागी बैठकले दुई अध्यक्षबीच थप सम्बाद गरेर पार्टी विभाजनबाट जोगिनुपर्नेमा जोड दिए । तर कुन बुँदामा मिल्ने भन्ने विषय चाहिं उक्त भेलाले पनि सुझाउन सकेन । त्यसैले नेताहरुबीच जति सम्बाद भएपनि मिल्ने अवस्था चाहिं देखिंदैन । बरु दुबै पक्षले सहमति गरेरै पार्टी विभाजन गर्दा राम्रो हुने छ ।