थप ७४० जनामा कोरोना, संक्रमित संख्या १५ हजार नाघ्यो

१९ असार, काठमाडौं । नेपालमा थप ७ सय ४० जनामा कोरोना संक्रमण पुष्टि भएको छ । पछिल्लो २४ घण्टामा ४ हजार भन्दा धेरै व्यक्तिमा गरिएको परीक्षणमा ७ सय ४० जनाको रिर्पोट पोजेटिभ आएको स्वास्थ्य तथा जनसंख्या मन्त्रालयले जनाएको छ । यससँगै नेपालमा कोरोना भाइरस संक्रमितको संख्या १५ हजार २ सय ५९ पुगेको छ ।

मन्त्रालयका प्रवक्ता जागेश्वर गौतमका अनुसार पछिल्लो केही दिनयता लगातार संक्रमितको संख्या बढ्दै गएको छ । सँगै निको हुनेको संख्या पनि बढ्दो छ । अहिलेसम्म ६ हजार १ सय ४३ जना कोरोना जितेर अस्पतालबाट डिस्चार्ज भएका छन ।

आजदेखि परीक्षणको दायरा फराकिलो बनाइएको पनि उनले बताए । संक्रमणको जोखिम बढेसँगै सरकारले कोरोना परीक्षणको दायरा बढाएको उनको भनाई छ । क्यान्सर, मधुमेह, इमर्जेन्सीमा आउने र विभिन्न अस्पतालमा उपचारारहत बिरामीको पनि परीक्षण गरेर कोरोना संक्रमितको पहिचानमा तिब्रता दिइएको गौतमले बताए ।