नेपाल भित्रिन लागेको सलहलाई हावाले उडाएर भारत फर्कायो

१९ असार , काठमाडौं । भारतबाट नेपाल भित्रिन लागेको सलह कीराको झुण्डलाई हावाले उडाएर फेरि भारततिरै फर्काईदिएको छ । बिहीबार दिउँसो नेपाल भित्रिन लागेको सलहको ठूलो झुण्डलाई हावाले उडाएर भारततिरै फर्काएको कृषि तथा पशुपंक्षी विकास मन्त्रालयले जनाएको छ ।

सुनसरीको इटहरीमा रहेको सलहको झुण्ड मनसुनी वायुले गर्दा झण्डै साढे दुई सय किलोमिटर पर धकेलिएको मन्त्रालयले जनाएको छ । हावाका कारण अब नेपालमा थप सलह भित्रिने सम्भावना कम रहेको मन्त्रालयको भनाई छ । बर्षा पनि बढेकाले सलह भित्रिने र फैलिने समस्या केही हदसम्म कम हुने मन्त्रालयका अधिकारीहरुको बुझाई छ ।

यस्तै सलह नियन्त्रण गर्न सरकारले संयुक्त राष्ट्र संघको खाद्य र कृषि कार्यक्रमँग सहयोग माग्ने भएको छ । संयुक्त राष्ट्रसंघ अन्तर्गतको खाद्य र कृषि कार्यक्रमसंग सलह नियन्त्रणका लागि कृषि मन्त्रालयले सहयोग माग्न छलफल अघि बढाइएको छ ।

भारतमा सलह फैलिँदै गएको र त्यसको असर नेपालमा पनि पर्नसक्ने भएकाले निकट भविष्यमा सलह प्रकोप बढ्न सक्ने र यसका लागि नेपालसंग अनुभव नभएपछि सहयोग मागिएको हो ।