मेलम्चीको पहिलो अडिट मार्गबाट पानी परीक्षण

२१ असार, काठमाडौं । मेलम्ची खानेपानी आयोजनाको मुख्य सुरुङमा परीक्षणका लागि पानी हालिँएकाे छ । आइतबार बिहान ९ बजे मुख्य सुरुङमा पानी हालिएको आयोजनाले जनाएको हाे ।

काठमाडौंतर्फ पानी जाने सुरुङ बन्द गरेर आयोजनाको पहिलो अडिट मार्गबाट पानी परीक्षण गरिएको हो । हेलम्बु गाउँपालिका–१ अम्बाथानमा रहेको मुहान क्षेत्रबाट केही तल रहेको पहिलो अडिटमार्गको सुरुङसम्म पानी हालेर परीक्षण गरिएका प्रमुख जिल्ला अधिकारी उमेशकुमार ढकालले जानकारी दिए ।

मेलम्चीको मुख्य सुरुङमा पानी हालेर परीक्षण गरिएको आयोजनाका कार्यकारी निर्देशक रितेशप्रसाद खत्रीको भनाइ छ । मेलम्ची खानेपानी आयोजनाका कामबारे जानकारी दिनका लागि मन्त्री बिना मगरले ३ बजे सिंहदरबारस्थित मन्त्रालयमा पत्रकार सम्मेलन बोलाएकी छन् ।

मेलम्चीको सुरुङ निर्माणको काम सकिएको र परीक्षणको काम बाँकी रहेको मन्त्री मगरले यसअघि प्रतिनिधिसभाको विकास तथा प्रविधि समितिमा बताएकी थिइन् ।

आगामी आर्थिक वर्षमा लागि मन्त्रालयका लागि विनियोजन गरिएको बजेटमाथि संसदमा उठेका प्रश्नको जवाफ दिने क्रममा मन्त्री मगरले मेलम्चीमाथि उठेका प्रश्नको अन्त्य गर्ने बेला आएको बताएकी थिइन् । वर्षौंदेखि विवादित रहेको मेलम्ची आयोजना सम्पन्न हुने क्रममा रहेको मन्त्रालयका अधिकारीले दाबी गर्दै आएका छन् ।