‘ढलको पानीबाट कोरोना सरेको पुष्टि भएको छैन’

२१ असार, काठमाडौं । पछिल्लो समय काठमाडौं उपत्यकाका ढलमा समेत कोरोना भाइरस देखिएको समाचारप्रति आफ्नो गम्भिर ध्यानाकर्षण भएको स्वास्थ्य तथा जनसंख्या मन्त्रालयले जनाएको छ । केही दिनअघि काठमाडौंमा ढलमा समेत कोरोना भाइरस भेटिएको पुष्टि भएपछि त्रास फैलिएको थियो ।

सरकारले ओषत तापक्रम रहेको पानीमा कोरोना भाइरस हुन सक्ने भन्दै सतर्क रहन आग्रह गरेको छ । साथै अहिले ढलमा भेटिएको कोरोना भाइरसका विषयमा थप अनुसन्धान भइरहेको पनि मन्त्रालयका प्रवक्ता डा. जागेश्वर गौतमले जानकारी दिए ।

उनका अनुसार ढलमा मात्रै नभई संक्रमितले छोएका ठाउँमा पनि केही समयसम्म कोरोना भाइरस रहन सक्ने भन्दै सतर्कता अपनाउन आग्रह गरिएको छ । पछिल्लो समय धेरै संक्रमितको उपचारमा रात दिन खटिएका स्वास्थ्यकर्मीलाई आवश्यक साथ सहयोग दिन पनि मन्त्रालयका प्रवक्ता गौतमले आग्रह गरेका छन ।