राष्ट्रपतिले मर्यादा बिर्सिन, देशलाई ठूलो क्षति हुदैछ : डा. लोहनी

२१ असार, काठमाडौं । राष्ट्रिय प्रजातन्त्र पार्टी राप्रपाका अध्यक्ष डा. प्रकाशचन्द्र लोहनीले राष्ट्रपति विद्यादेवी भण्डारीले संवैधानिक पदीय मर्यादा बिर्सदा देशलाई ठूलो नोक्सानी हुने चेतावनी दिएका छन ।

राष्ट्रपति भण्डारीले पदीय मर्यादाविपरित केही नेताहरुलाई मन्त्री पदको आश्वासन दिएर सत्तारुढ नेकपाभित्रको विवाद समाधान गर्न एकपक्षीय भूमिका खेलेको भन्दै आलोचना बढेका बेला राप्रपाका अध्यक्ष लोहनीले यसले देशलाई ठूलो क्षति हुने चेतावनी दिएका हुन ।

यद्यपी यसको असर तत्काल नदेखिने उनको भनाई छ । पत्रपत्रिकामा नेकपाभित्रको आन्तरिक विवाद मिलाउन केही नेताहरुलाई मन्त्री पदको आश्वासन दिइएको र संवैधानिक राष्ट्रपति सक्रिय हुन खोजेको भन्दै लोहनीले राष्ट्रपति भण्डारीको गतिविधिप्रति आपत्ति जनाएका छन ।

सामाजिक सञ्जाल फेसबुकमा स्टाट्स लेख्दै राप्रपा अध्यक्ष लोहनीले पत्रपत्रिकामा आएका समाचारमा राष्ट्रपति कार्यालयको खण्डन नआएकाले यो गम्भिर विषय भएको पनि बताएका छन । पूर्व परराष्ट्रमन्त्री तथा अर्थविद समेत रहेका लोहनीले राष्ट्रपति भण्डारीले यस्ता गतिविधि रोकेर आफ्नो पदीय मर्यादामा नबसे देशमा अर्को संकट आउन सक्ने चेतावनी दिएका छन ।

नेकपाभित्र प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्डबीचमा सत्ता संघर्ष चुलिदा राष्ट्रपति भण्डारीले प्रत्यक्ष रुपमै ओलीलाई सघाइरहेकी छन । जसले गर्दा उनलाई विवादमा तानेको छ ।