अब मास्क नलगाए प्रहरीले पक्राउ गर्ने

२२ असार, काठमाडौं । सरकारले लकडाउन खुकुलो भएको बाहनामा हेलचेक्राई गर्नेविरद्ध कडा कदम चालेको छ । कोरोना संक्रमितको संख्या बढ्दै गएपछि प्रहरीले मास्क नलगाई घरबाहिर निस्कनेलाई पक्राउ गर्ने भएको छ ।

अब मास्क नलगाई घरबाहिर निस्कनेलाई पक्राउ गरी संक्रामक रोग ऐन २०२० अनुसार कारबाही गर्ने गृह मन्त्रालयको योजना छ । कोरोना संक्रमणको खतरा अहिले पनि रहेको र हाल लकडाउन पूर्ण रुपमा नखुली व्यवस्थित मात्र गरिएको सरकारको भनाइ छ ।

जरुरी कामबाहेक घरबाहिर ननिस्कने, निस्कँदा अनिवार्य मास्क लगाउने, एकअर्काबीच कम्तीमा २ मिटरको सामाजिक दूरी कायम गर्नुपर्ने सरकारले बताएको छ ।

तर पछिल्लो समय बाहिर निस्केका धेरैजसोले मास्क नलगाउने र लगाएपनि सामाजिक दुरी कायम नगर्ने समस्या छ । जसकारण कोरोना संक्रमण थप फैलिदो क्रममा रहेको छ ।