फागुनमा १४ औं महाधिवेशन गर्ने कांग्रेसको निर्णय

२३ असार, काठमाडौं । लामो छलफल, बहस र रस्साकस्सीपछि नेपाली कांग्रेसले १४ औं महाधिवेशन फागुनमा गर्ने निर्णय गरेको छ। कोरोनाभाइरस महामारीले क्रियाशील सदस्यता वितरण, नविकरणलगायतका काम तीन महिनादेखि रोकिए पनि कांग्रेस केन्द्रिय कार्यसमिति बैठकले फागुन ७ देखि १० गतेसम्म महाधिवेशन गर्ने निर्णय हो ।

महाधिवेशन काठमाडौंमै हुने छ । सोमबार साँझ सकिएको केन्द्रीय समिति बैठकले महाधिवेशन फागुनमै गर्ने निर्णय गरेको मुख्यसचिव कृष्णप्रसाद पौडेलले दिए । प्रदेशलगायत तल्ला निकायका अधिवेशन कार्यतालिकामा भने हेरफेर गरिएको छ।

कांग्रेसले कोरोना महामारीकै बीच अब बाँकी रहेका करिब ३० जिल्लामा समायोजनका काम, क्रियाशील सदस्यता वितरण तथा नविकरणका काम सुरू गर्न लागेको हो। कोरोनाका कारण महाधिवेशन प्रभावित हुने भन्दै कांग्रेसमा विवाद थियो ।