नेपालमा पहिलोपटक चार जिल्ला कोरोनामुक्त

२३ असार, काठमाडौं । नेपालमा पहिलोपटक चार जिल्ला कोरोनामुक्त भएका छन । प्रदेश १ का तीन जिल्ला र कर्णालीको एक जिल्ला गरी चार जिल्ला कोरोनामुक्त भएका स्वास्थ्य तथा जनसंख्या मन्त्रालयले जनाएको छ ।

मन्त्रालयका प्रवक्ता जागेश्वर गौतमले भोजपुर, सोलुखुम्बु, तेह्रथुम र हुम्ला जिल्ला कोरोनामुक्त भएका बताए । यी जिल्लामा थोरै संख्यामा देखिएका संक्रमितले कोरोना जितेपछि जिल्ला नै कोरोनामुक्त भएका हुन ।

नेपालका ७७ वटै जिल्लामा कोरोना संक्रमण फैलिएपछि जोखिम बढेको थियो । तर विस्तारै संक्रमित निको भएपछि जिल्लाहरु कोरोनामुक्त हुन थालेका छन । बाँकी ७३ जिल्लामा संक्रमितको संख्या घटबढ भइरहेकै छ ।

नेपालमा पहिलोपटक गएको माघमा काठमाडौँ उपत्यकाका व्यक्तिहरुबाट कोरोना संक्रमण शुरु भएको थियो ।