तलब नदिएपछि एभिन्यूज टेलिभिजनका कर्मचारी आन्दोलित

२३ असार, काठमाडौं । एभिन्यूज टेलिभिजनका कर्मचारी विगत लामो समयदेखि काम गरेको पारिश्रमिक नपाएको भन्दै आन्दोलनमा उत्रिएका छन् । कोरोनाको कहर सुरु भएपछि टेलिभिजनले कर्मचारी कटौती गर्ने तथा काम गरिरहेकालाई समेत समयमा तलब नदिने गरिरहेको उनीहरुको आरोप छ ।

कोरोनाको कारण देखाउँदै टेलिभिजन प्रशासनले २ दर्जनभन्दा बढी कर्मचारी तथा पत्रकारलाई पाउनुपर्ने तलब नदिएपछि उनीहरुले आन्दोलनको तयारी थालेका हुन् । यो एभिन्यूज खबर टेलिभिजन स्थापनाकालदेखि नै कर्मचारीमाथि शोषण गर्ने र पारिश्रामिक दिने विषयमा बदनाम हुँदै आएको टेलिभिजन हो । टेलिभिजन छोडेका कतिपयले ५/६ वर्ष बित्दा पनि आफुले पाउनु पर्ने बक्यौता रकम पाउन सकेका छैनन् । पटकपटक ताकेता गर्न कार्यालयमा जाँदा उल्टै प्रशासनबाट दुर्व्यवहार सहनु परेको पीडितको आरोप छ ।

तर यसपटक भने टेलिभिजन छोडेका पूर्वकर्मचारी संगठित भई आफुले पाउनु पर्ने पारिश्रमिक जसरी पनि लिने भन्दै नेपाल पत्रकार महासंघ गुहार गर्न पुगेका हुन् । आज विहानै भृकुटीमण्डपमा भेला भई उनीहरुले आफुले पाउन बाँकी तलब उल्लेख गर्दै हस्ताक्षर सहित महासंघमा उजुरी गरेका छन् । एभिन्यूज छोडेका करिब डेढ दर्जनले आफुहरुले काम छोडेको लामो समय बित्दा पनि पारिश्रमिक पाउन नसकेको गुनासो गरेका छन् । एभिन्यूज प्रशासनमा पारिश्रमिकका लागी फोन गर्दा कहिले के भनेर झुलाउने गरेको उनीहरुको आरोप छ ।

आज पारिश्रमिक माग गर्दै हस्ताक्षर गर्नेमा टेलिभिजन छोडेको २ वर्षदेखि ६ महिना समय बिति सकेका र अहिले कोरोनाको कहर बिच तलब नदिएरै छोड्न बाध्य पारिएका कर्मचारी सम्म रहेका छन् । १ हप्ताभित्रमा काम गरेवापतको तलब नदिए चरणवद्ध रुपमा कडा आन्दोलनमा जाने पीडित कर्मचारीहरुको भनाई छ ।