विश्व स्वास्थ्य संगठनले स्वीकार गर्‍यो- ‘हावाबाट पनि कोरोना फैलिन्छ’

४ असार, एजेन्सी । वैज्ञानिक अनुसन्धान र चौतर्फी दबाब परेपछि विश्व स्वास्थ्य संगठनले कोरोना भाइरस हावाको माध्यमबाट पनि सर्ने बताएको छ । यसअघि विश्वका दुई सयभन्दा धेरै वैज्ञानिकहरुले विश्व स्वास्थ्य संगठनलार्य पत्र लेखेर कोरोना भाइरस हावाबाट पनि फैलिन सक्ने भन्दै हालको दिशानिर्देश संशोधन गर्न भनेका थिए ।

तर विश्व स्वास्थ्य संगठनले त्यसलाई अस्वीकार गर्दै आएको थियो । पछिल्लो समय चौतर्फी दबाब र वैज्ञानिक अनुसन्धानबाट समेत पुष्टि भएपछि संगठनले यो कुरालाई स्वकार गरेको हो ।

क्लिनिकल इन्फेक्सियस डिजिज जर्नलमा गत सोमबार प्रकाशित भएको एक खुला पत्रमा ३२ देशका २ सय ३९ जना वैज्ञानिकहरुले कोरोना भाइरस हावामा अडिन सक्ने र कुनै व्यक्तिले स्वास फेर्दा अरु व्यक्ति पनि संक्रमित हुनसक्ने प्रमाण दिएका थिए ।

कोरोना भाइरस संक्रमणको महामारीसँग सम्बन्धित विश्व स्वास्थ्य संगठनका प्राविधिक प्रमुख मारिया वान केरखोवले कोरोना भाइरस हावाबाट फैलिएको आशंकाबारे आफूहरुले छलफल गरिरहेको र वैज्ञानिकले दिएका प्रमाण स्वीकार गर्नुको विकल्प नभएको बताएका छन ।