आईजीपी थापाको पहिलो भाषण : प्रहरीको बर्दीमा दाग लगाउनेलाई निर्मम कारवाही हुन्छ

२५ असार, काठमाडौं । नेपाल प्रहरीका नवनियुक्त आईजीपी शैलेश थापा क्षेत्रीले पहिलो भाषण नै कडा शब्दमा व्यक्त गरेका छन् । गृहसचिवबाट फूली लगाएपछि आईजीपी थापाले आफ्नो कर्तव्यपथमा अडिग रहने बताएका हुन् । तर नेपाल प्रहरीको बर्दीमा दाग लगाउनेलाई निर्मम कारबाही गर्ने चेतावनी पनि उनले दिएका छन् ।

गृह मन्त्रालयमा भएको दर्ज्यानी चिन्ह प्रदान कार्यक्रममा नवनियुक्त आईजीपी थापाले देश, जनता र सरकारको निःस्वार्थ सेवाका लागि प्रतिबद्ध रहेको बताए । कानूनले तोकिएको जिम्मेवारी इमान्दारीपूर्वक निर्वाह गरिने उनको विश्वास छ ।

प्रहरी व्यक्तिगतभन्दा संस्थागत निर्णयमा चल्ने भएकाले सोही वातावरण सिर्जना गर्न आफू दत्तचित्त भएर लाग्ने आईजीपी थापाले बताए । आफ्नो स्वभाव नै नम्र भएकाले त्यसलाई कमजोरी नठान्न भन्दै उनले भने “कसैले पनि बर्दीमा दाग लगाउँछ भने निर्ममरुपमा कारवाही गरिन्छ ।”