नेकपाको स्थायी कमिटी बैठक एक हप्तासम्मका लागि स्थगित

काठमाडौं । प्रधानमन्त्री तथा नेकपाका अध्यक्ष केपी शर्मा ओली र अर्का अध्यक्ष प्रचण्डबीचको वार्ता निष्कर्षमा पुग्न नसकेपछि नेकपाको स्थायी कमिटी बैठक एक हप्तासम्मका लागि स्थगित भएको छ ।

पछिल्लो एक हप्तायता दुई दुई दिन गरेर स्थगित हुदै आएको बैठक यसपटक भने एक हप्तासम्मका लागि स्थगित भएको हो ।

नेकपामा पदीय भागबण्डामा लामो समयदेखि विवाद छ । प्रधानमन्त्री केपी शर्मा ओलीको सरकार सफल नभएको भन्दै पदबाट राजीनामा दिनुपर्ने माग प्रचण्ड र माधव नेपाल पक्षको छ । तर ओली तत्काल राजीनामा दिन तयार छैनन् ।

स्थायी कमिटी बैठकमा बहुमत सदस्यले प्रधानमन्त्री ओलीको राजीनामा माग गरेपछि नेकपाको विवाद उत्कर्षमा पुगेको हो । फेरि बैठक बोलाउँदा आफूले राजीनामा दिनुपर्ने डरले पनि प्रधानमन्त्री ओली बैठक बोलाउन तयार छैनन् । पछिल्लो समय दैनिक ओली र प्रचण्डबीच वार्ता भएपनि त्यो निष्कर्षमा पुग्न सकेको छैन् ।

जसकारण स्थायी कमिटी बैठक एक हप्तासम्मका लागि स्थगित भएको हो । नेकपाका प्रवक्ता नारायणकाजी श्रेष्ठले विभिन्न ठाउँमा बाढी, पहिरो, डुबान लगायतका कारण आएको विपदका कारण बैठक स्थगित गरिएको बताएका छन ।