सेती र कालङ्गा नदीले बगाउँदा तीन जना बेपत्ता

बझाङ । बझाङको कालङ्गा नदीले बगाउँदा दुई जना बेपत्ता भएका छन् । बेपत्ता हुनेमा केदारस्युँ गाउँपालिका ४ का १४ वर्षीय किशोर जगत अधिकारी र केदारस्युँ गाउँपालिका १ का १३ वर्षीय किशोर रोशन परियार रहेका छन् ।

जगत शुक्रबार साँझ ६ बजे कालङ्गा नदीमा जाल फाल्दै गर्दा बगेको चप्पल रोक्ने क्रममा बगेका हुन् । रोशन शनिबार दिउँसो २ बजे नदीमा पौडी खेल्ने क्रममा बगेर बेपत्ता भएको प्रहरी नायब उपरीक्षक गणेश बलले बताए । अहिले उनीहरु दुवै जनाको खोजी कार्य भइरहेको छ ।

त्यस्तै गएको असार १६ गते छबिसपाथिभेरा गाउँपालिकाको किनाल्ना भिरबाट मोटरसाइकलसहित सेती नदीमा खसेका भनिएका रोल्पा घर भइ बझाङमा काम गर्दै आएका ३२ वर्षीय प्रतापसिंह कुलमगर पनि अहिलेसम्म बेपत्ता रहेका छन् ।