तिलाठी कोइलाडीको गाउँसभाले बाढी पीडित, कोरोना तथा प्रकोप पीडितलाई प्राथमिकता

◊ धीरुभाइ

सप्तरी । सप्तरीको तिलाठी कोइलाडी गाउपालिकाको सम्पन्न चौथो गाउँ सभामा चट्याङ्ग, आगलागी, शीतलहर, बाढी, सर्पदंश जस्ता प्रकोपको कारण ज्यान गुमाएका ब्यक्तिको परिवारलाई किरिया खर्च वापत जनही पचिस हजार रुपियाँ प्रदान गर्ने निर्णय गरेको छ ।

सभाले खाँडो खोलाले प्रत्येक वर्ष कटान, डुबान गरी करोडौंको धनजन क्षति गरिरहेको हुँदा सो नदीमा दुवैपट्टी बनाइएको बाँधलाई थप बलियो बनाउन खाँडो नदी नियन्त्रण आयोजना लगायतका अन्य सम्बन्धित निकायहरुमा सिफारिस साथ पठाउने निर्णय गरेको छ ।

कोरोना भाइरसका कारण मारमा परेका कृषकलाई सुविधा दिन गाईभैंसी पालन गर्न इच्छुक कृषकहरुलाई सहकारी संस्थामार्फत एक बर्षभित्रै फिर्ता गर्ने गरी बिना ब्याज ५० प्रतिशत निब्र्याजी ऋण दिन कृषक उत्थान घुम्ती कोष निर्माण गर्ने निर्णय गरेको बताउँदै गाउँपालिकाका अध्यक्ष सतिशकुमार सिंहले यसका लागि आवश्यक कार्यविधि तयार गर्न गाउँपालिकालाई निर्देशन दिइएको बताए । गाउँपालिकाका सबै विद्यालयहरुमा विपद् जोखिम न्युनीकरण शिक्षालाई अनिवार्य गर्ने निर्णय गरिएको अध्यक्ष सिंहले बताए ।

यसैगरी कोभिड १९ नियन्त्रण तथा शान्ति सुरक्षा कायम गर्न उल्लेखनीय भूमिका निर्वाह गरेका सशस्त्र प्रहरी बल बोर्डर आउट पोष्ट तिलाठी र कोइलाडी बर्साइन, प्रहरी चौकी तिलाठी र कोइलाडी बर्साइन, क्वारेन्टाइन ब्यवस्थापनमा सहयोग गर्ने तिलाठीका सन्तोष कुमार झा र रञ्जयकुमार यादव, मावि कट्टीका प्रधानाध्यापक विपीन झा र सन्तोषचन्द्र सिंह तथा वडा सचिवहरुलाई समेत सम्मान गरेकोे छ ।

क्वारेन्टाइनमा जोखिम मोलेर खाना पकाई खुवाउने मावि कट्टीका कैलु मण्डल र लौनियाका विरेन्द्र साह तथा गाउँपालिकाका एम्बुलेन्स चालक अमरेन्द्र देवलाई नगद दुई हजार एक सय रुपियाँ, गम्छा र प्रशंसा पत्रले सम्मान गरिएको गाउँपालिकाका कार्यक्रम अधिकृत राजेशकुमार झाले बताए ।

सो सभाको उद्घाटन सत्रमा कोरोना भाइरस रोकथाम तथा नियन्त्रणमा उल्लेखनीय कार्य गरेको भन्दै गाउँपालिकाका सबै स्वास्थ्यकर्मीहरुलाई गम्छा ओढाई प्रशंसा पत्र प्रदान गरिएको गाउँपालिकाका निमित्त प्रमुख प्रशासकीय अधिकृत राजुकुमार झाले बताए ।