बाढीले तिलाठीको भन्सार, प्रहरी चौकीसहित ५० घर डुवानमा !

◊ धीरुभाइ

सप्तरी । सप्तरीको तिलाठी कोइलाडी गाउँपालिका वडा नं. १ तिलाठीको बेल्ही टोलमा खाँडो नदीमा आएको बाढी पस्दा करिब पचासभन्दा बढी घर डुबानमा परेको छ भने सोही बाढीमा बेल्ही भन्सार कार्यालय, सशस्त्र तथा नेपाल प्रहरीको चौकी समेत डुबानमा परेको गाउँपालिका विपद् व्यवस्थापन अधिकृत राजेशकुमार झाले बताए ।

बाढी बस्तीमा प्रवेशसँगै सोही ठाउँमा रहेको भन्सार कार्यालय, सशस्त्र तथा नेपाल प्रहरीको चौकी समेत डुबानमा परेको छ । बाढीले राजविराज तिलाठी सडक खण्डलाई समेत दुई ठाउँमा बाढीले क्षति पु¥याएको गाउँपालिका अध्यक्ष सतिशकुमार सिंहले जानकारी दिए ।

भन्सार बजारको पसलहरु बाढीले डुबानमा पर्दा स्थानीय ब्यापारीहरुको लाखौंको क्षति भएको बताइएको छ । खाँडो नदीको बाढीसँगै करिब आठदेखि दश वटा लास समेत बगेर आएको लौनियाका प्रत्यक्षदर्शी गजेन्द्र मण्डलले बताए । लास आएको बेला अत्यन्तै दुर्गन्ध फैलिने गरिएको मण्डलले बताए । बाढीले सयौं विघामा लगाइएको धानबाली समेत डुबानमा परेको छ ।